CPP/NPA-Negros Island ROC: Pangapinan ang pumuluyo kag kinaiyahan

Propaganda statement posted to the Communist Party of the Philippines (CPP) Website (Sep 1, 2021): Pangapinan ang pumuluyo kag kinaiyahan

JUANITO MAGBANUA

SPOKESPERSON

NEGROS ISLAND REGIONAL OPERATIONAL COMMAND (APOLINARIO GATMAITAN COMMAND)

NEW PEOPLE'S ARMY

SEPTEMBER 01, 2021

Ang mga bag-o nga rebolusyonaryong martir nga sila Ka Ella kag Ka Pabling nga napatay sa kamot sang 79th IB sadtong Agosto 20 gilayon nga gintawag sang militar nga “extortionist” kag “notoryus nga terorista.” Pabalikbalik ini nga itom nga propaganda sang militar agud musingan ang maayo nga imahin sang New People’s Army (NPA) kag rebolusyonaryo nga kahublagan kag hinabonan ang pagka-idu-ido sang Philippine Army sa mga hasyendero kag dalagku nga negosyante partikular sa Silay City.

Sadtong Abril 12 sini nga tuig, gindayaw sang pumuluyo ang paglunsar sang punitibo nga aksyon sa yunit sang Roselyn Jean Pelle Command sang NPA North Negros Front (RJPC-NPA) batok sa makahalalit nga quarry operation sang Mayor sa Silay City nga si Mark Andrew J. Golez sa diin tatlo ka backhoe nga ginapanag-iyahan kag gina-opereyt sang mga Golez ang ginpangsunong sa quarry site sa Hacienda Vista Alegre, Barangay E. Lopez, Silay City.

Sabat ini sang RJPC-NPA sa demanda sang pumuluyo nga silutan ang abusado nga large-scale quarrying operation sa suba sang Malogo nga nagtuga sang mga serye sang mga pagbaha sa norte nga bahin sang Negros sugod sadtong bag-ong tuig. Masobra sa 70,000 ka mga pumuluyo sang E.B. Magalona kag mga syudad sang Talisay, Silay, Victorias, Cadiz, Sagay, Escalante kag San Carlos ang nadislokar kag apektado tungod sang pagbaha sugod sang Enero.

Ginklaro man sang RJPC-NPA nga indi interisado ang Demokratiko nga Gobyerno sang Pumuluyo sa pagkolekta sang rebolusyonaryong buhis halin sa mga dalagku nga mga negosyo nga nag-opereyt sulod sa teritoryo sini nga nagatuga sang malapad nga pagkaguba sang kinaiyahan pareho sa pagkarumpag sang duta, pagtuga sang baha sang panahon sang tig-ulan, kag hilo nga tuga sang mga kimikal nga ginagamit. Makahalalit ini sa pumuluyo. Nagakadapat silotan ang mga ini sa pagguba sa dunang manggad nga tani magamit para sa matuod nga pungsodnon nga industriyalisasyon kag reporma sa duta nga amo ang pundasyon sa pag-uswag sang pungsod.

Wala na sang iban pa nga “extortionist” kundi ang nagakolekta halin sa mga dalagku nga negosyo para sa minilyon nga protection money kabaylo sa kabuhi sang pumuluyo kag sang aton kinaiyahan. Nagakadto ini sa bulsa sang mga nagapungko sa poder kag bayaran nga mersenaryo nga Armed Forces of the Philippines kag Philippine National Police (AFP/PNP) samtang halos napabayaan ang pagpatigayon sang mga sosyal nga serbisyo para sa pumuluyo ilabi na subong panahon sang COVID-19 pandemya.

Wala na sang iban pa nga “notoryus nga terorista” kundi ang AFP/PNP kag National Task Force to End Local Communist Armed Conflict (NTF-ELCAC) idalum sa rehimen Duterte nga nagpatuman sa kampanya “kontra-insurhensya” nga nagtuga sang malaba nga listahan sang paglapas sang tawhanon nga kinamatarung kontra sa pumuluyo. Si Ka Ella mismo ang biktima sa bayolasyon sang 79th IB sa International Humanitarian Law sa diin ginpatay siya bisan indi na makabato.

Ginainto lang sang tigtaghol sang militar ang ila kaugalingon nga ginapatihan pa sila sang pumuluyo. Ang pagluntad sang Demokratiko nga Gobyerno sang Pumuluyo sa masobra lima ka dekada sa idalum sang pagpamuno sang Communist Party of the Philippines nagpamatuod nga ginasuporta ini sang malapad nga masa kag malipayon nga nagaangkon sang serbisyo halin sini.###

Mabuhay ang masang pigos!

https://cpp.ph/statements/pangapinan-ang-pumuluyo-kag-kinaiyahan/