CPP/NPA-Southwest Negros: Pagpauntat sang pagmina

Propaganda statement posted to the Communist Party of the Philippines (CPP) Website (Oct 31, 2020): Pagpauntat sang pagmina

ANDREA GUERRERO

SPOKESPERSON

NPA-SOUTHWEST NEGROS

NEGROS ISLAND REGIONAL OPERATIONAL COMMAND

APOLINARIO GATMAITAN COMMAND

NEW PEOPLE'S ARMY

OCTOBER 31, 2020

Ang Rebolusyonaryong Gobyerno sang Pumuluyo nagaluntad sa bisan diin nga bahin sang Pilipinas. Gobyerno ini sang pumuluyo nga nagapangapin kag nagapaseguro sang ila kaayuhan kag kaseguruhan sa kabuhi kag pangabuhian. Nagapamatok ini sa kon ano man nga akto nga nagahalit sa kinaiyahan kag makatuga sang halit sa pumuluyo.

Ang pagmina, isa sang indi ginapahanugutan sang Rebolusyonaryo nga Gobyerno tungod sang madamo na nga panghitabu nga nagpamatuod sang daku nga kahalitan nga natuga sa pangabuhian sang madamo nga pumuluyo kag nag-utas man sang madamo na nga kabuhi.

Sa Southern Negros, bantog ang kalidad sang bulawan nga may mataas nga Grade. Kag ginakilala bisan sa mga Large Scale Miners, amo kon ngaa madamo sang maganyat kag mag-interes sini. Ang ginhimo sadto sang Philex Mining Corporation kag Maricalum isa ka buhi nga halimbawa sang daku nga kahalitan nga natuga sa pumuluyo sa diin nag-antus ang pumuluyo sang epekto sini hasta sa subong. Ang lugar nga ginmina indi na magamit kag ma-uma sang pumuluyo tungod bisan ginatos pa ka tuig ang makalipas indi mapabalik ang katambok sang duta. Ang epekto sang mga kemikals nga gingamit nga nagpollute sang tubig sa mga kasubaan kag kasapaan nga indi na magamit sang mga tawo sa pag-irigar sang ila nga mga pananum, pag-inom sang kasapatan kag ang paggamit mismo sang mga pumuluyo kag nagtuga pa ini sang sakit. Sa kabilugan nagaguba ini sang kinaiyahan. Basehan sang pagdumili kag lubos nga indi pagpasugot sa pag-operar sang anuman nga Mining Corporation sa lugar.

Sang Otubre 5, 2020, pasado 5:30 sang aga, ginsulod sang Unit sang New People’s Army ang Golden Valley Small Scale Miners Association agud pa-untaton sa ila nga pag-operar tungod illegal ini nga nagsulod sa AOR sang NPA sa sakop sang Brgy. Narra kag nagaborder sa Upper part sang Brgy. Inayawan, Cauayan, Negros Occidental. Direkta ini nga nagkadto sa Mining Site dala ang ila nga mga kagamitan kag nag-operate sa pagmina nga wala sang kon ano nga konsesyon nga nahimo sa mga nagapanag-iya sang duta kag sa aktwal indi magpasugot ang tag-iya kag madamo sang indi gid pabor sa pagmina. Ang target nga minahon nagalapad sang 5 ka hektarya sa isa lang ka nagapanag-iya kag may iban pa nga mga katambi nga mga luna. Sa una palang nga pila ka adlaw nga pag-operate, naglubog na ang kasapaan kag kasubaan kag nagreklamo na ang mga pumuluyo kay indi na sila makagamit sang tubig. Nagreklamo ang tag-iya sang duta kay ginabasol sila sang madamo nga mga tawo ngaa nagpasugot sila kay apektado ang hasta sa ubos kag indi lang ina, hasta sa iban nga baryo nga sakop sang Syudad sang Sipalay sa diin maagyan kag maabutan sang agos sang tubig.

Nakaabot sa igtalupangod sang NPA ang pagsulod sang sini nga Manugmina kag ang reklamo sang mga pumuluyo kag ginhimuan ini sang tikang para mapauntat ang pag-operar. Ginkadtuan sila kag gin-edukar kabahin sang ila ilegal nga pagmina, gin-athag ang basehan sang rebolusyonaryo nga gobyerno sa pagpauntat sa basehan nga makaguba sang kinaiyahan kag labi pa ang halit nga tugahon sini sa pumuluyo.

Matawhay ang pag-estoryahanay sa mga trabahante. Gintawgan sang salaligan ang ila Financier/Buyer kaangot sini. Ginhatagan sila sang plaso nga sa sulod sang 3 ka adlaw madala na nila balik ang ila nga mga kagamitan. Wala sang kwarta ukon ano nga mga personal nga kagamitan nga ginkuha sa ila magluwas sang boluntaryo nila nga ginpanghatag.

Sa Financier/Buyer kag sa mga trabahante sang Golden Valley Small Scale Miners Association gina-apresyar ang ila pagkooperar sa tikang sang Rebolusyonaryo nga Gobyerno.

Pamatukan ang pagguba sang kinaiyahan, pamatukan ang pagmina!

https://cpp.ph/statements/pagpauntat-sang-pagmina/