CPP/NDFNPA-Negros Island ROC: Pasulit-sulit nga kabutigan sang AFP/PNP agud hinabunan ang ila mga kapaslawan

Propaganda statement posted to the Communist Party of the Philippines (CPP) Website (Nov 1, 2020): Pasulit-sulit nga kabutigan sang AFP/PNP agud hinabunan ang ila mga kapaslawan

JUANITO MAGBANUA

SPOKESPERSON

NEGROS ISLAND REGIONAL OPERATIONAL COMMAND

APOLINARIO GATMAITAN COMMAND

NEW PEOPLE'S ARMY

NOVEMBER 01, 2020

Ang pasulit-sulit nga kabutigan kag matiplangon nga propaganda sang berdugo kag mersenaryo nga militar bahin sa kuno madamu na ang nagsurender nga mga katapu sang CPP/NPA isa ka disperado nga tikang agud hinabunan ang mga kapaslawan sang rehimen sa ila kontra-insurhensya nga programa. Ang gusto nga paggwaon sang mersenaryo nga militar nga nangin madinalag-on ang ila kampanya kontra sa rebolusyonaryo nga kahublagan.

Damlag lang, nagpaggwa sang pahayag ang berdugo nga militar nga may nagsurender nga walo ka mga katapu sang NPA sa syudad sang Guihulngan kag anum ka katapu sang NPA ang nagsurender sa Banwa sang Bindoy, Negros Oriental.

Ang ini nga modus operande sang mersenaryo nga militar, ang peke nga pagpasurender, indi na bag-o kag wala nagasulbar sa ugat sang problima sa insurhensya kundi kon paano makapangawat sa kaban sang gobyerno. Ang tagsa ka indibidwal nga mapasurender sang militar may pagabatunon nga P50,000 bilang livelihood assistance kag P15,000 halin sa local government unit bilang immediate assistance. Apang basi sa pagpangusisa sang Apolinario Gatmaitan Command, wala ni isa sa mga ginakabig nga nagsurender ang nakabaton sang total nga P65,000 nga dapat para sa ila.

Ang natabu nga pagpasurender sang 2,510 ka mangunuma sa syudad sang Escalante satong Sept. 20, 2019 nga kon sumahon ang kantidad nga dapat batunon sang mga ginakabig nga mga surenderre naglab-ot sa P163,150,000. Sa pagkamatuod wala ini nabaton sang makaluluoy nga mga mangunguma kag kon may nabaton gid man, sensilyo nalang kay nagkadto ini sa bulsa sang mga hakugan nga opisyal sang militar kag opisyal sang lokal nga yunit sang gobyerno. Indi lang ini natabu sa syudad sang Escalante kundi sa mga syudad kag banwa sa sakop sang isla sang Negros. Ang natabu nga pagpasurender sa 63 ka mga mangunguma sa banwa sang Murcia nga dapat magbaton sang total nga P3,150,000 apang ang natabu, ang mga makaluluoy nga mga mangunguma nagbaton lang sang tigslima ka kilo sang bugas.

Pinakamalala, ginagamit pa ang mga pwersado kag peke nga surrender agud sundon ang pasulit-sulit nga kabutigan agud higku-an ang pangalan sang rebolusyonaryo nga hukbo sang pumuluyo. Pilit sila nga ginapasunod sa sala nga pahayag sang AFP/PNP agud ikondisyon ang kahimtangan para sa malapnagon nga crackdown batok sa mga kritiko sang pasista nga gobyerno ni Duterte.

Padayon nga nagabangis ang terorismo sang mersenaryo nga AFP/PNP sa pumuluyo sa patarasak nga pagpasurender sa mga ordinaryong sibilyan para tabunan ang ila mga kapaslawan sa mahigko nga gyera nga ila ginalunsar batok sa pumuluyo. Ang madasig nga pagpasar sang Anti Terrorism Act of 2020 nga nagahatag ligwa sa terorismo sang estado ang hayagan nga nagapamatu-od nga ang rehimen Duterte mismo upod ang ido-ido nga AFP/PNP amu ang matuod nga terorista.

Ang mga pagpabangud sa mga progresibo nga organisasyon, mga aktibista, lider masa, mga artista, mga kritiko kag mga oposisyon nga may angut sa Communist Party of the Philippines, New People’s Army (CPP/NPA) isa ka wala sang basehan nga akosasyon kag tuyo lang sini nga pahipuson ang mga maisog nga nagabuyagyag sa kagarukan kag anomaliya sang tiraniko nga rehimen.

Sa sini nga punto, kompyansado kag segurado ang rebolusyonaryo nga kahublagan sa pagpamuno sang Communist Party of the Philippines nga paslawon ang kontra-insurhensya nga programa sang reaksyonaryo kag uhaw sa dugo nga rehimen Duterte agud wasakon ang rebolusyonaryo nga kahublagan partikular sa isla sang Negros. Wala ni isa sa lima ka larangan gerilya sa Negos ang nawasak sa pihak sang masingki nga operasyon militar, sa baylo padayon ini nga nagalapad kag nagabaskog.

Dapat hatagan sang katapusan ang pag-antus sang pumuluyo sa idalum sang tiraniko nga rehimen Duterte. Dapat mag-isa ang bug-os nga pumuluyo, tukuron ang malapad nga alyansa kontra Duterte kag palayason sa poder. Mag-upod kag aton pabaskugon ang armado nga paghimakas kag silutan ang mga may utang nga dugo sa pumuluyo para mahatagan sang hustisya ang mga biktima sang tiraniko kag berdugo nga rehimen.###

Mabuhay ang Masang pigos!

Isulong ang Armado nga paghimakas tubtob sa kadalag-an!

https://cpp.ph/statements/pasulit-sulit-nga-kabutigan-sang-afp-pnp-agud-hinabunan-ang-ila-mga-kapaslawan/