CPP/NDF-NEMR: Mga angayang sundon sa mga kandidato diha sa pagpangampanya sa barangay eleksyon sulod sa erya sa NDFP

NDF-Northeastern Mindanao Region propaganda statement posted to the Communist Party of the Philippines (CPP) Website (May 8): Mga angayang sundon sa mga kandidato diha sa pagpangampanya sa barangay eleksyon sulod sa erya sa NDFP

Ka Maria Malaya, Spokesperson
NDFP Northeastern Mindanao

8 May 2018
Press Release

Karong umaabot nga Mayo 14, 2018 laing hugna na usab sa pasundayag sa burgis nga eleksyon ang ipahigayon sa reaksyonaryong gobyerno sa Pilipinas. Bisan tuod kun kini Barangay ug Sangguniang Kabataan lang nga eleksyon apan laumang mobaha na usab ang mga saad sa mga pulitiko ug kwarta nga ipamalit sa boto. Tungod kay segurado nga ang matag kapitan/tsirman ug konseho nga modagan gimanok ug gipundohan sa dagkung mga pulitiko aron himoong pundasyon o puhunan sa umaabot nga eleksyong lokal ug nasyonal sa 2019.

Walay kalahian ang barangay eleksyon sa hulagway sa mga nangaging eleksyon, usa ka reaksyonaryong eleksyon ug nagpalig-on sa mga mapahimuslanon ug madaugdaugong hut-ong nga naghari sa Pilipinas. Busa, ang rebolusyonaryong kalihukan wala nagaila sa reaksyonaryong eleksyon nga makasulbad sa mga batakang suliran sa katawhang Pilipino. Dili mahimong dalan sa pagtunhay sa tinuod nga gahum sa katawhang pinahimuslan ug dinaugdaug ang burgis nga eleksyon sa atong nasud.

Apan subay sa kasamtangang nagatunhay nga pulitikanhong kahimtang, ginakonsidera sa National Democratic Front of the Philippines-North Eastern Mindanao Region (NDFP-NEMR) ang panginahanglan sa mga kandidato nga mangampanya diha sa ilang mga baryo ug mapasibaw sa mga botante ang ilang mga katungod sa gawasnong pagpili sa mga maayong kandidato nga tinuod nga moserbisyo sa interes sa katawhan.

Sulod sa erya sa NDFP sa rehiyon, ang tanang mga kandidato giawhag nga mosubay sa mga angayang sundon nga mao ang mosunod:

1. Ginadili ang pagdala og armas sa mga kandidato atol sa pangampanya aron malikayan nga dili makahasi ngadto sa katawhan bisan gitugutan pa sila sa COMELEC nga magdala og armadong escort;

2. Ginadili ang si bisan kinsang kandidato nga mangampanya nga makig-uban sa mga militar/para-militar ug mga pwersa sa AFP nga nagpahigayon sa Community Organizing for Peace and Development (COPD) nga mag-impluwensya, mamugos ug mangsaywar sa mga botante kun si kinsa ang ilang suportahan;

3. Ginadili sa mga kandidato ug sa ilang mga tigpangampanya sa paghimo og mga kontra-rebolusyonaryong aktibidad sulod sa erya sama sa pagpaniktik ug pagpangdaut o pagpang-intriga batok sa rebolusyonaryong kalihukan ug pagsabwag og kabangis o panghulga sa mga botante o kaatbang nga kandidato;

4. Ginadili usab ang pagpakuyog sa mga tawo nga may bug-at nga krimen batok sa katawhan ug sa rebolusyonaryong kalihukan atol sa ilang mga pagpangampanya sa baryo tungod kay target sila (mga dautang elemento sama sa mga kriminal, drug lords ug uban pa) sa aksyong militar sa BHB;

5. Hugot nga ginadili ang pagpamalit og boto.

Labing maayo nga makigkoordina ang si bisan kinsang mga kandidato ngadto sa mga hingtungdang yunit sa Bagong Hukbong Bayan (BHB) aron sa dugang pagpatin-aw niining maong mga angayang sundon sa mga kandidato diha sa pagpangampanya sulod sa mga erya sa NDFP.

Ginaawhag ang katawhan panahon sa adlaw sa piniliay nga dili magpagawong o magpasaywar sa militar ug dagkong pulitiko kun si kinsa ang ilang pagapilion.

Ang pangrehiyong kumand sa BHB-NEMR nagmando na sa tanang mga yunit ubos sa iyang kumand nga hugot ipatuman kining mga angayang sundon sulod sa mga rebolusyonaryong erya. Sa pikas bahin, gipahinumdoman usab ang tanang mga yunit sa BHB nga huptan diha sa pagpatuman niini ang hugot nga disiplina ug mga lagda sa Bagong Hukbong Bayan ug sa Demokratikong Gobyerno sa Katawhan.
https://www.philippinerevolution.info/statements/20180508-rn-rnmga-angayang-sundon-sa-mga-kandidato-diha-sa-pagpangampanya-sa-barangay-eleksyon-sulod