Kinaray-a News: Kalinong kag progreso ginatib-ong kang ELCAC

From the Philippine Information Agency (Jan 30, 2020): Kinaray-a News: Kalinong kag progreso ginatib-ong kang ELCAC (By Liez'l Marie Lamasan)

SAN JOSE, Antique, Enero 30 (PIA6) -- May kaangtanan sa kalinong kag progreso kang probinsya ang mga hirikuton nga ginapatigayon angot sa National Task Force to End Local Communist Armed Conflict (NTF-ELCAC), ini ang pahayag kang Antique Police Provincial Office (PPO).

Suno kay Information Officer kag Staff Sergeant John Mark Gonzaga, lakip sa mga binuhatan nga gina-implementar kaupod ang mga ahensya kang gobyerno amo ang information and education campaign, gift-giving ka mga barangay, kag pagtukod kang task forces ka mga pulis.

“Wara run ti iban pa kami nga bisyon kundi ang maghili-usa para sa kalinong kag progreso”, kuon ni Gonzaga.

Sa bahin kang mga lokal nga gobyerno, nagpalapnag run kang executive orders ang mga alkalde nga nagpahayag kang persona non grata sa mga rebelde.

Anda man nga ginpadayon kang mga kapulisan ang pagtugro kang suporta sa pagpatigayon kang Enhancement of the Comprehensive Local Integration Program (E-CLIP) bilang paghikayat sa mga rebelde nga magbalik sa bahin kang gobyerno.

Sa pagpatuman kang E-CLIP, makabaton kang bulig halin sa gobyerno ang mga anay myembro kag pamilya kang Communist Party of the Philippines (CPP), New People’s Army (NPA) kag National Democratic Front (NDF) nga luyag bayaan ang pag-ginamo sa baylo nga sila mangin mabinungahon nga mga pumuluyo.

“Ginatugruan sanda kang cash incentives nga makabulig kananda kapin pa sa pagpatindog kang negosyo,” ginpaathag ni Gonzaga.

Samtang, sa ana nga pagbisita ni Police Regional Office (PRO-6) director PBGen. Rene Pamuspusan sa Antique PPO, luyag niya nga ma-sustener ang estado kang Antique bilang hilway sa mga gamo.

“Now you realized how fast the progress and the development of the province is when that problem is gone, and I hope we could showcase this that Antique province has already progressed a lot (Makita ninyo karon kon ano ka dasig ang progreso kag pagsanyog kang probinsya kon waay ron ra nga problema, kag ginalauman ko nga mapakita ta dya nga ang Antique hanggud ron gid man ang pag-uswag)”, pahayag ni PBGen. Pamuspusan.

Ginpasad ang NTF-ELCAC paagi sa Executive Order 70 nga gin-mando ni Presidente Rodrigo Duterte nga may tinutuyo sa pagpasanyog kang participatory governance agud maagom ang padayon nga kalinong kang pungsod. (JSC/LML-PIA6 Antique)

https://pia.gov.ph/news/articles/1033636