VIGAN CITY – “Mapunas koma a maminpinsan ti problema ti insurhensia iti Ilocos Sur tapno agtalinaed ti kappia,” kinuna ni Gobernador Ryan Luis V. Singson kabayatan ti pannakaipaima ti kadagupan a P65,000.00 a tulong tunggal maysa kadagiti tallo a dati a rebelde a simmuko idi 2017 manipud iti ili a Banayoyo ken Siudad ti Candon.
Segun iti gobernador, nadardaras ti panagdur-as ti probinsia nga Ilocos Sur no agkaykaysa dagiti umili a sumuporta kadagiti agdama programa ti gobierno, ken no awan ti problema ti insurhensia ken seguridad.
“Alaek ngarud daytoy a gundaway a mangawis kadagiti kakabsat tayo ken kakailliantayo a nabatbati a kameng ti New People’s Army (NPA) a sumuko kayon, ken agtitinnulongtayo a mangpadur-as ti probinsiatayo nga Ilocos Sur,” kinunana ni Singson.
“Tagtagainepko ti natalna a probinsia a no sadino ket agkikinammayet ken agtitinnulong amin a lumugar manipud kadagiti naduma-duma a sektor para iti pagsayaatan ti tunggal umili iti Ilocos Sur,” innayon ni Singson.
Pormal a naited ti tulong kadagiti tallo a simmuko a rebelde kabayatan ti simple a seremonia a napasamak iti kapitolio idi Hulio 6, 2018 nga inatendaran dagiti nangangato nga opisiales ti Philippine Army, PNP, DOH, DOLE, DTI, DILG, DSWD, DA, DepEd, TESDA, NCIP, PhilHealth ken PIA.
Naipaay ti tulong kadagiti dati a rebelde babaen ti Enhanced- Comprehensive Local Integration Program (E-CLIP) iti administrasion ni Presidente Rodrigo R. Duterte.
Manipud idi Hulio 2016, umaboten ti 30 a dati a rebelde ti simmuko ken tinulongan ti gobierno ti probinsia nga Ilocos Sur.
Imbaga pay ni Singson a no kayat dagiti tallo a simmuko a rebelde ti agbasa, sisasagana ti probinsia a mangipaay ti scholarship ken allowance para kadakuada.
No comments:
Post a Comment
Note: Only a member of this blog may post a comment.