CPP-Panay Regional Committee propaganda statement posted to the Communist Party of the Philippines Website (Dec 26): Maisog nga Batuan ang Teroristang Atake sang Us-Duterte nga Pasistang Rehimen
Pahayag sang Partido Komunista ng Pilipinas (PKP)-Panay Region sa okasyon sang ika-49 nga anibersaryo sang Partido Komunista ng Pilipinas
Regional Committee
CPP-Panay
26 December 2017
Pula nga panamyaw sa tanan nga mga kadre kag katapuan sang Partido Komunista ng Pilipinas sa aton ika-49 nga tuig! Diri sa rehiyon sang Panay nangin madinalag-on kag madinuagon ang dugang nga isa ka tuig sang aton rebolusyunaryo nga paghimakas.
Sa sulod sang isa ka tuig, mapainubuson naton nga ginapaabot ang pila ka natigayon sa patag sang pagpadaku kag pagpabakod sang Partido, mas dalagku nga taktikal nga opensiba, mas nagadako kag nagabaskog nga baseng masa, mas militante kag nagalapad nga mga aksyon sang pumululuyo batuk sa tiraniya kag neo-kolonyal nga mga imposisyon. Upod sa aton mga ganar, aton man nga ginadumdom kag pasidunggan ang mga rebolusyonaryo nga baganihan kag martir sang New People’s Army, rebolusyonaryo nga mga organisasyong masa kag alyado. Ginsakripisyo nila ang ila kabuhi sa pagbato kontra sa imperyalista nga pangginahum, sa pagpanghimulos sang dalagku nga kumprador kag agalon nga may duta kag batuk man sa pasismo sang estado. Gasaludar kita sa ila pag-amot nga mahawanan ang masiok nga dalan pakadto sa tunay nga kahilwayan.
Napasiguro sang organisasyon sang Partido sa Panay ang mas hugot nga paghiliusa sa pagsikway sang konserbatismo kag sa bag-o nga programa sang Ikaduha nga Kongreso sang Partido. Napakita ini sa mga natigayon naton nga mga kadalag-an sa ideolohiya, pulitika, militar kag organisasyon. Napadamo naton ang aton katapuan kag kadre kag nahatagan sang mas paborable nga pwesto sa mas madasig nga paghanas kag pagdebelopar sang ila mga potensyal, kinaadman kag ikasarang paagi sa promosyon kag pagtukod sang mga nagakaigo nga mga istruktura sang organisasyon. Kumpyansado kita nga mas epektibo kag madinalag-on nga mapamunuan sang Partido ang pagpakigbato sa US-Duterte nga rehimen.
Ang aton hangaway sang banwa nag-uswag sa numero kag kinaadman nga makit-an sa pagdaku sang Pulang hangaway sang isa ka daku nga platun kag mas makahas nga mga taktikal nga opensiba batuk sa mga mersenaryo nga suluguon ni Duterte. Bisan gamay pa sa numero pero daku sa mga ideya kag may masangkad nga suportang masa, naisahan sang NPA ang paborito ni Duterte nga pwersa sang PNP sa isa ka makahas nga reyd sa adlaw sa police municipal station sang Maasin. Nakuha ang masobra sa isa ka dosena nga hinganiban nga wala sang isa ka lupok.
Isa pa ka tampok nga kadalag-an amo ang asud-asod nga mga aksyong militar bilang sabat sa nagapalala nga pasismo sang estado nga ginapangunahan sang numero uno nga terorista sang Pilipinas, sa iya nga pagduko sa amo nga imperyalistang US. Sa sulod sang 13 ka adlaw sang nagligad nga Nobyembre, ang mga yunit sang NPA nakalunsar sang 5 ka bira sa Iloilo kag Antique batuk sa AFP kag PNP. May 4 nga kaaway ang napatay kag 16 ang napilasan. Bisan pa nga ara sa depensiba kag napatyan kita sang 3 ka kaupod sa isa ka inaway sa Cuartero, Capiz nagbato sila kag nakapatay sang 3 ka tropa sang AFP kag nakapilas sang pila pa.
Ang aton baseng masa, ang pundasyon kag wala kutod nga suporta sang rebolusyonaryo nga paghimakas signipikante nga nagdako kag ang rebolusyunaryo nga impluwensya tayuyon nga nagalapad paagi sa pagbawi sang mas madamo nga mga barangay sa mas madamo nga munisipalidad. Nahimo ini sa pagtukod sang mas madamo nga mga yunit sang NPA para sa hilikuton masa kag militar.
Padayon ang organisado nga pagpamatuk sang pumuluyong tumandok sa kabukiran sang Calinog kag Tapaz batuk sa kontra-pumuluyo kag makahalalit nga mga proyekto nga dam sang gubyerno kag mga dumuluong-kapitalista. Bisan pa unay ang pamahog sang 61st IB sa pumuluyo nga nagapamatuk, sa gihapon maisog kag pursigido ang masa nga magbuyagyag sa halit sang mga dam sa ila pangabuhi kag ginademanda nga untaton ini.
Indi lang ang mga rebolusyonaryo nga base ang nagabato sa mapintas nga rehimen ni Duterte. Ang malapad nga pumuluyo sa Panay, lapaw sa direkta nga impluwensya sang rebolusyonaryo nga pwersa, nagpakita sang pagkadismaya tubtub sa kaakig sa huramentado nga pagpamatay ni Duterte ilabi na sa iya gyera kontra-druga. Ang kasakuon sang iya pamatay malapit 4 ka bes sa kasakuon sa pamatay sang pinatalsik nga diktador Marcos. Kaanggid sa iya idolo nga Marcos, ang sabat sang rehimen sa balido nga mga protesta sang pumuluyo amo ang pagbansag, pamahog kag pagpamatay mismo sang mga aktibista. Upod sa pungsodnon nga pagpakamalaut maisog nga ginkontra sang mga nagmuklat nga pumuluyo sa rehiyon halin sa kubay sang simbahan, akademya, istudyante, mga organisasyon sang pumuluyo, bisness kag propesyunal ang wala basehan nga mga deklarasyon sang rehimen Duterte nga pagpalawig sang martial law kag plano nga peke nga rebolusyonaryo nga gobyerno sa katuyuan nga paluntaron ang diktaduryal nga pangginahum. Upod nga naggwa sa dalanon ang madamu nga bag-o nga mga personalidad kag pwersa sa pagdemanda nga untaton ang pagpamatay, bawion ang martial law sa Mindanao, untaton ang kontraktwalisasyon kag pagsukot kay Duterte sang iya mga pangako. Mas nagalapad nga kubay sang pumuluyo ang nagabugtaw sa makahalalit nga pangginahum niya.
Nagbaskog ang ligal kag demokratiko nga paghimakas sang mga pigos nga sahi kag sektor. Ang mga mangunguma nga nagabungkal sa pila ka malagpad nga duta sang mga lokal nga agalon, nangisog sa pihak sang pamahog sang mga goons kag paramilitar kag nagbarikada, nagpetisyon kag nagpiket agud itulod ang reaksyunaryo nga gobyerno nga ipatuman ang reporma sa duta. Ang malapad nga alyansa sang mga tsuper sa Panay nag-upod sa iban pa nga tsuper sa pungsod sa mabaskog nga pagpamatuk sa jeepney phase-out paagi sa paglunsar sang makaduha ka bes nga transport strike sang Pebrero kag Hunyo. Nakalab-ot sa 98-99% sang pangpubliko nga mga jeepney drayber sa Panay pati Guimaras ang nag-upod sa duha ka hugnat nga strike. Napakig-away sang mga titser ang ila kinamatarung sa pag-unyon kag sang mga istudyante para sa libre nga edukasyon.
Ang ika-49 nga tuig sang Partido Komunista sang Pilipinas nag-umpisa sa tunga sang klima nga may nagaluntad nga negosasyon pangkalinungan sa tunga sang GRP kag NDFP sa diin mataas ang paglaum sang pumuluyong Pilipino nga maresolbar ang ugat sang armado nga inaway sa aton pungsod. Sa pihak nga bahin nagtakop ini sa tunga sang lubos nga pagsirado sang pasistang rehimeng Duterte sang peace talk kag pagbuhi sang tais na nga bansag sa CPP-NPA-NDFP nga terorista nga organisasyon kag gindalahig pa ang mga ligal nga demokratiko nga mga organisasyon sang pumuluyo.
Sa sulod sining isa ka tuig makatatlo ka bes nga hinali gin-untat ni Duterte ang pagpadayon sang peace talk suno sa iya kapritso sa diin ginabasol ang CPP-NPA nga padayon kuno nagabira sa iya mga tropa (bisan wala man gani sang untat-lupok nga nakasugtan). Ang matuod sini amo nga wala sang seryoso nga handum si Duterte nga lubaron ang mga problema sang pumuluyo paagi sa peace talk kundi ang solo nga kagustuhan niya amo nga mapauntat ang paglupok sang mga pusil sang NPA nga wala pa maestoryahan ang nakasugtan nga agenda labi na ang sosyo-ekonomiko nga mga reporma.
Bangud indi niya mapasugot ang CPP-NPA sa indi prinsipyado nga ceasefire kag nagakapikon sa mga madinalag-on nga mga bunal kag tira sang NPA batuk sa iya bayaran nga tropa, arbitraryo nga nagdesisyon si Duterte nga wala na sang peace talk. Opisyal nga gindeklarar niya ang pag-untat sang negosasyon pangkalinungan paagi sa Proclamation 360 kag masunod ang pagbansag sa CPP-NPA-NDF nga mga terorista paagi sa Proclamation 374. Ginhinambit pa niya nga pagsunod ini sa sadto pa nga deklarasyon sang iya amo nga imperyalistang US nga ang CPP-NPA mga FTO (foreign terrorist organization).
Target sang US-Duterte nga pasistang rehimen kag iya mga militaristang heneral nga ubuson ang NPA sa sulod sang 2018. Todo-arangka man ang iya opensiba sa media nga terorista na ang pagkabig sa CPP-NPA-NDF lakip na ang ligal nga mga demokratiko nga organisasyon kag pati ang nagasuporta, naga-pinansya kag nagahatag buhis sa rebolusyonaryo nga gobyerno. Ang sin-o man nga mabansagan nga ‘terorista’ mahimo nga patyon, arestuhon ukon pasakaan panumbungon. Ini tanan nga mga pamahog sang pasistang diktador nga dugang nga pamatay, pangdakop kag panalakay nagatuyo nga mapahadlok ang rebolusyunaryo nga pwersa kag pumuluyo.
Apang pareho sang nagliligad nga mga reaksyunaryong rehimen mapaslawan ang US-Duterte. Determinado kita kag nagasalig nga masabat ang iya hangkat kag malutos ang mas brutal, mas madugo kag mas mapintas nya nga gyera kontra sa pumuluyo kag rebolusyunaryo nga pwersa.
Dapat dugang nga papag-unon sang tanan nga katapu sang Partido ang pang-ideolohiya nga pundasyon pangunahon paagi sa pagsangkap sang kada bag-o nga katapu sang BKP, masiguro ang IKP sa tanan nga mga kadre kag malagas ang AKP sa mga kadre sa rehiyunal asta distrito nga lebel. Pat-uron sang Partido sa rehiyon nga mahim-os ang pagpanadlong sa masunod nga programa.
Dapat mas maalam naton nga tun-an ang kaaway kag paano makontra ang iya bag-o nga mga taktika kag hinganiban. Palitikan labi sang pamunuan sang Partido kag Hangaway ang pagdihon sang mas epektibo kag mas matalom nga mga taktika nga makadulot sang mas dalagku nga halit sa kaaway, makakabig sang dugang nga armas samtang mahalong man nga ginapreserbar ang kaugalingon.
Labi nga hangkaton kag habigon ang ginatos nga pamatan-on halin sa mamumugon, mangunguma, estudyante kag intelektwal para sa Hangaway kag iban pa nga mga hilikuton sa armado nga paghimakas. Tuman ka paborable subong ang krisis pang-ekonomiya kag pulitika sang nagaharing sahi sa pungsod para sa pagpasingki kag pagpataas sang lebel sang inaway gerilya pakadto sa paglumpat sa masunod nga halintang sang inaway-banwa. Kinahanglan ang labi nga pagpadaku sang hangaway agud malab-ot ang gusto naton nga lebel sang inaway.
Tuman ka importante ang aton malig-on, nagalapad kag wala nagakahubas nga suporta kag baseng masa agud masustiner ang nagapasinsin kag nagalapad nga inaway gerilya. Ang kaaway nagahimo sang tanan nga pamaagi agud maagaw ukon madulaan kita sang baseng masa — halin sa pakuno-kuno nga mga charity works, medical mission, socio-eco projects, scholarship, hatag obra, suhol, etc. hasta sa pagpamahog, pangdakop, pamatay, pamomba kon indi nila makuha ang masa sa pakuno-kuno.
Hatagan sang mataas nga importansya ang pagkonsolida sang baseng masa sa kaumhan kag sa puting lugar. Siguruhon ang pagpamuno sang Partido paagi sa mga sanga sang Partido sa lokalidad, mga grupo sang Partido sa mga sektor kag labi nga pamuadon ang mga rebolusyunaryo nga organisasyon masa, mga self-defense corps, mga lokal nga milisya kag mga lokal gerilya.
Dapat pamunuan sang Partido ang hugot nga paghiliusa sang rebolusyonaryong pwersa sa pag-atubang sang subong nga sitwasyon, mga hilikuton, hangkat kag mga sakripisyo. Handaan kag ipatuman ang mas madasig nga pagdaku kag pagkonsolida sa ideolohiya, pulitika kag organisasyon sa tunga sang mas mapintas nga salakay sang rehimen.
Kinahanglan mapamunuan kag mahugpong ang pinakamalapad nga pumuluyo nga maisog nga magbato para mapauntat ang mga mapintas, garuk kag maki-dumuluong nga mga polisiya sang rehimen, mapunggan ang plano sang martial law sa bilog nga pungsod kag pilit nga maduso ang matuod-tuod nga kalinungan. Kinahanglan ang pumuluyo mismo preparado sa kaisipan, balatyagon kag organisasyon agud maagum ang handum sang tunay nga kahilwayan, hustisya kag kalinong.
Ang tama nga pamumuno sang Partido sa Panay sa Hangaway sang Banwa, sa mga rebolusyunaryong pwersa kag sa pinakamalapad nga pumuluyo sa isla ang garantiya nga indi lang nga mapaslaw naton ang terorista nga atake sang US-Duterte nga diktadurya kundi makaamot man sa pagpabagsak sini.
Mabuhay ang PKP! Mabuhay ang pumuluyo nga nagahimakas para sa tunay nga kahilwayan kag kalinungan!
Rehiyunal nga Komite sang Partido
Partido Komunista ng Pilipinas
Rehiyon Panay
26 Disyembre 2017
No comments:
Post a Comment
Note: Only a member of this blog may post a comment.