NPA-Far South Mindanao propaganda statement posted to the Communist Party of the Philippines Website (Jun 2): Mainitong pagsaludar kay Ka Vergel ug Ka Jan, mga martir nga batan-ong Lumad
Dencio Madrigal, Spokesperson
NPA-Far South Mindanao (Valentin Palamine Command)
1 June 2017
Human nga gideklara sa rehimeng Duterte ang martial law sa Mindanao, ang 73rd IB-PA mipahigayon og mas kusganon nga opensibang operisyon batok sa katawhan ug ilang mga rebolusyonaryong pwersa sa utlanan sa mga probinsya sa Davao del Sur, Sultan Kudarat, South Cotabato ug North Cotabato.
Niadtong Mayo 25 sa alas 12:30 sa kaudtohon, gibirahan sa sapper team sa NPA ang usa ka grupo sa nagapatrolyang tropa sa 73rd IB. Kahaponon niadtong adlawa, mibalos ang AFP pinaagi sa paturagas nga artillery shelling.
Sa misunod nga adlaw, Mayo 26, nahitabo ang armadong panagsangka tali sa mga tropa sa Army ug sa buffer squad sa NPA. Narekober sa mga pasista ang eksplosibo, walo ka bakpak ug mga personal nga butang sa mga Pulang manggugubat apan napugngan sa mga kauban ang ilang pagpahigayon og mas dakung atake.
Niadtong Mayo 27, duha ka pasistang sundalo ang namatay dihang gidasmagan sa usa ka tim nga Pulang manggugubat ang usa ka kolum sa nag-operisyong 73rd IB bandang alas 3:30 sa kahaponon. Nasundan kini sa nahitabong panagsangka sa tali sa harassment team sa NPA ug mga militar sa alas 9:00 sa buntag niadtong Mayo 29 nga miresulta sa kamatayon sa duha ka mga Pulang manggugubat ug usa ka sundalo sa 73rd IB. Duha ka high power nga mga armas ug mga kabtangan sa namatayng mga kauban ang narikober sa pasistang tropa. Laing engkwentro ang nahitabo bandang alas 3:30 sa hapon sa mao gihapong adlawa diin usa ka sundalo ang gikaingong namatay.
Gisaludar sa VPC-ROC ug tanang rebolusyonaryong mga pwersa ug mga masa sa Far South Mindanao ang mga martir nga batan-ong Lumad nga nakigsangka hangtod sa katapusan. Si Ka Vergel (Arginel Catan) nga naggikan sa kaliwatang Bagobo sa North Cotabato, ug si Ka Jan (Jovani Tewaro) nga usa ka Lumad nga B’laan sa Davao del Sur, misampa sa NPA aron suklan ang pagpanglapas sa mga multinasyunal nga agribisnes ug large-scale mining sa ilang yutang kabilin.
Sa pagpahamtang og martial law sa Mindanao, mahimong mas dayag ang paggamit og mga pwersang militar ug pulis sa mga dagkung lokal ug multinasyunal nga agribisnes ug mga kompanya sa large-scale mining aron sumpoon ang pakigbisog sa mga Lumad ug mga mag-uuma alang sa yuta, panginabuhi ug pagpanalipod sa kinaiyahan.
Samtang nagkagrabe ang mga pagpangabuso sa tawhanong katungod tungod sa pagpahamtang sa martial law, mas daghang katawhan sa Mindanao ang matukmod sa pag-armas batok sa magun-obong sistema nga nagatulak kanila sa kumunoy sa grabeng pag-antos, pangdaugdaug ug inhustisya.
No comments:
Post a Comment
Note: Only a member of this blog may post a comment.