Cebuano news: Kanhi NPA nakadawat ug ganti gikan sa AFP

From the Philippine Information Agency (Jul 30): Cebuano news: Kanhi NPA nakadawat ug ganti gikan sa AFP

IMPASUGONG, Bukidnon,– Si Jonathan B. Nacar alyas "Totong," kanhi sakop sa PSP Toto, sa Guerrilla Front 4B, North Central Mindanao Regional Committee sa New People’s Army (NPA) nakadawat ug usa ka tseke nagkantidad sa P52,200.00 isip ganti alang sa AK-47 nga armas ug mga bala nga iyang gisurender bag-ohay pa lang, ngadto sa 8th Infantry Battalion sa Philippine Army ug sa mga lokal nga kagamhanan sa Impasugong, Bukidnon.

Si Lt. Col. Lennon G. Babilonia, 8th Infantry Battalion Commanding Officer sa Philippine Army, miingon nga ubos kini sa 'Guns for Peace' nga programa sa gobyerno.

Sa usa ka interview, si Jonathan, 24-anyos nga sakop sa Higaonon nga tribo, miingon nga gikapoy na siya sa mga bakak nga mga saad sa NPA ug sa ilang mga lider.

Subay niya nga siya kombinsido sa pag-apil sa armadong pakigbisog sa Bag-ong Hukbong Bayan (BHB) tungod kay siya nakumbinsi sa usa ka gitawag nga "agraryong rebolusyon."

"Ug tungod sa kawad-on, ako nalimbongan aron makigbatok sa gobyerno pinaagi sa armadong pakigbisog. Apan ang tanan pulos bakak lamang ug walay kamatuoran tungod kay samtang kami nga mga Pulang manggugubat sa Bag-ong Hukbong Bayan galisod sa lasang, walay gikaon, gitugnaw ug gipangmingaw sa amoang pamilya, diay ang mga Kadre ug mga lideres nagpalami sa ilahang kinabuhi didto sa mga kalungsuran." miingon siya.

Si Nacar usab midawat sa usa ka livelihood assistance nga P50,000.00 ug ang usa ka diha-diha nga cash assistance sa kantidad nga P15,000.00 gikan sa Comprehensive Local Integration Program (CLIP) sa buhatan sa Presidential Adviser on Peace Process (OPAPP), pinaagi sa Department of Interior and Local Government (DILG) sa Bukidnon.

Si Impasugong Mayor Anthony A. Uy, mitabang usab kang Nacar pinaagi sa Local Integration Program ug sa Impasugong Convergence Program nga gitawag "Magbuliga Koy."

Ang AFP Guns for Peace Program ug ang CLIP, uban sa mga LGUs , nagtumong sa pagpalambo sa kalinaw pinaagi sa pagtinabangay kon ‘Bayanihan’ aron sap ag-awhag sa atong igsoong mga rebelde nga mo-surender na ug mobalik na sa sabakan sa balaod.

Tuyo usab sa maong programa ang pagtabang sa mga kanhi rebelde sa pag-andam kanila ingon nga sila mobalik ngadto sa katilingban.

Si Nacar, kinsa usab mikumbinsi sa iyang kanhi mga kauban sa pagsurender, nagpasalamat sa 8th Infantry Battalion ug Impasugong LGU sa pagtabang kaniya samtang siya mipasig-uli uban sa iyang pamilya ug sa komunidad.

http://news.pia.gov.ph/article/view/1501438264387/cebuano-news-kanhi-npa-nakadawat-ug-ganti-gikan-sa-afp