Hiligaynon News: Nag organisa sang 'Volt in for Peace' ginpasalamatan

From the Philippine Information Agency (Feb 3, 2021): Hiligaynon News: Nag organisa sang 'Volt in for Peace' ginpasalamatan (By Alex Lumaque)

SYUDAD SANG ROXAS, Capiz, Pebrero 3 (PIA) -- Kapin sa 300 ka mga residente sa kabaranggayan sang banwa sang Tapaz ang nakabenepisyo sa outreach program sang Regional Task Force to End Local Communist Armed Conflict (RTF - ELCAC) sa Rehiyon 6 nga ginpatigayon sang nagligad nga semana sa Tapaz Civic Center.

Ang nasambit nga inisyatibo nga ginpangunahan sang Police Regional Office - 6 kag Philippine Army bilang mga katapu sang RTF - ELCAC ang nakapaabot sang bulig medikal subongman sikolohikal, libre nga pagpagunting magluwas pa sa mga regalo ukon gift packs nga ginhatag sang PRO - 6 kag lokal nga panguluhan sang probinsya kag kwarta nagikan naman sa lokal nga panguluhan sang Tapaz.

Ginpangunahan ni mayor Roberto Palomar ang pagpasalamat sa mga nag-organisa sang kahiwatan nga lubos nga nakabulig sa mga Tapaznon.

Gindugang pa sang alkalde nga ang gobyerno ang nagapaninguha pinaagi sa "whole-of-nation approach" agud nga ang katawhayan kag pagsanyog may katumanan.

Matandaan nga ginpatigayon man sa Tapaz ang Panay Peace Summit sang nagligad nga bulan sang Disyembre kon sa diin nangin dinapit nga mga bisita sanday Presidential Communications Operations Office Undersecretary Lorraine Marie Badoy, SOLCOM Commander Lt. Gen. Antonio Parlade, Jr. kag anay kadre sang NPA nga sanday Eric Almendras alyas “Ka Eric” kag Joy James Saguino alyas “Ka Amihan" kag iban pa.

Ang summit ang inisyatibo man sang RTF - ELCAC kag 301st Infantry Brigade sang Philippine Army sa bulig kag kooperasyon sang mga lokal nga panguluhan agud nga labi pa gid nga maduso ang katawhayan pinaagi sa pagtapos sa mga pagpatalang sang mga rebelde nga NPA kag pag-engganyo sa aktibo nga mga rebelde nga magsurrender kag liwat nga magsugod sang matawhay nga pangabuhi sa sosyedad sa bulig sang gobyerno. (JBG/AAL/PIA Capiz)

https://pia.gov.ph/news/articles/1065831