CPP/NPA-Central Negros/Negros Island ROC: Pahayag sang NPA sa Serye sang Pagpamatay sang mga Inosenteng Sibilyan sa Guihulngan

Propaganda statement posted to the Communist Party of the Philippines (CPP) Website (Dec 17, 2020): Pahayag sang NPA sa Serye sang Pagpamatay sang mga Inosenteng Sibilyan sa Guihulngan

JB REGALADO

SPOKESPERSON

NPA-CENTRAL NEGROS

LEONARDO PANALIGAN COMMAND

NEGROS ISLAND REGIONAL OPERATIONAL COMMAND

APOLINARIO GATMAITAN COMMAND

NEW PEOPLE'S ARMY

DECEMBER 17, 2020

Lubos ginakondenar sang Leonardo Panaligan Command-New People’s Army Central Negros ang asud-asod nga pagpamatay sang 62nd IBPA sa pagpamuno 62nd IBPA Commanding Officer Col. Melvin Flores sa mga inosente kag wala ikasarang magbato nga mga sibilyan sa Guihulngan City, Negros Oriental.

Ang pagtiro patay kay Dra. Rose Sancelan upod sa iya pinalangga nga bana sadtong December 15, 2020 alas 5:00 sa hapon sa Brgy Poblacion, Guihulngan bangud lamang sang pagpasibangud nga kuno suporter sang NPA kag gina-akusahan nga amo si Ka JB Regalado bilang tagpamaba sang Leonardo Panaligan Command sang Bag-ong Hangaway sang Banwa.

Lunsay kabutigan ang nasambit nga akusasyon sang pasistang militar, kapulisan, mga vigilante nga grupo sang KAGUBAK kag mismo sang rehimeng US-Duterte. Ini isa ka matalaw nga tikang kag kalakasan sang 62nd IBPA batok sa mga inosenteng sibilyan. Gusto lang hinabunan sang pasistang makinaryas sang reaksyunaryong estado sa pagpanguna sang rehimeng US-Duterte ang ila kapalpakan sa pagpapas sa rebolusyonaryong kahublagan ilabe na sang presensya sang CPP-NPA sa Guihulngan.

Kadungan man sa kamatayon nila Dra Sancelan kag sang iya bana, ang pagtiro patay pa gid sa isa man ka inosenteng sibilyan nga si Israel Alsong sang Brgy Calamba, Guihulngan City.

Desperado man ang AFP/PNP, mga vigilante kag iban pa nga kontra-hublag nga grupo sa Central Negros bangud nahublasan kag palpak nga kampanyang militar, peke nga pagpasurender, pagpangwarta nga E-CLIP kag iban pa nga pasuni sang rehimeng Duterte sa pagpatalang sa pumuluyo idalum sa National Task Force-ELCAC (EO #70).

Bisan anu pa man, indi malutos ang NPA bangud sang madalom na nga suporta sang malapad nga masa sa Central Negros kag iban nga bahin sang isla. Indi man ma-into ang pumuluyo sa mga pagpatalang sang militar kag ni Duterte. Pabilin nga nagadamgo lamang ang pasistang militar, kapulisan kag iban pa nga anti-komunista sa pagwasak sang rebolusyonaryong kahublagan sandig sa maragtason nga inagihan sang CPP-NPA gikan sa iya pagkapundar tubtob subong.

Segurado ang CPP-NPA kag bug-os nga rebolusyonaryong hublag nga samtang padayon man gina-atake kag ginabayolar ang tawhanon nga kinamatarung sang mga sibilyan sa pagpatuman sang anti-terror law sang rehimeng Duterte, maga-usbong ang armadong paghimakas sa kaumahan kag maga-ani sang malapad nga suporta ang rebolusyonaryong kahublagan gikan sa pumuluyo kag madamo ang magpasakop sa New People’s Army.

Ginamanduan ang tanan nga yunit sang NPA idalum sa Leonardo Panaligan Command sa paglunsar sang lapnagon nga taktikal nga opensiba sa paghatag sang nagakaigo nga hustisya sa mga biktima sang pagpang-abuso militar kag pasismo sang rehimeng US-Duterte. Paslawon ang pasistang kampanyang militar, anti-terror law, Martial Law kag rumpagon ang rehimeng US-Duterte!###

https://cpp.ph/statements/pahayag-sang-npa-sa-serye-sang-pagpamatay-sang-mga-inosenteng-sibilyan-sa-guihulngan/