MALAYBALAY CITY, Agosto 17 (PIA)—Nakadawat ug hinabang gikan sa gobyerno ang 38 ka mga kanhing rebelde ubos sa programang Enhanced Comprehensive Local Integrated program kon E-CLIP.
Mikabat sa P1.7 million ang total sa gipang-apod-apod sa Bukidnon E-CLIP Committee niadtong Huwebes, Agosto 13, sa nasangpit nga 38 ka mga Former Rebels (FRs), diin 23 kanila ang ‘Regular’ nga NPA ug 15 ang ‘Militia ng Bayan.’
Ang 23 ka mga ‘Regular’ nakadawat ug tag P50,000 nga cash alang sa ‘livelihood assistance’ ug dugang P15,000 nga cash para sa ‘immediate assistance’ matag usa kanila; samtang nakadawat usab ug tag P15,000 matag usa ka FR nga miyembro sa ‘Militia ng Bayan’.
Nagpasalamat si Governor Jose Ma. Zubiri sa mga kanhing rebelde nga nibalik na sa sabakan sa gobyerno. Matud niya nga mas malipay pa siya kung ang tanang kauban nila nga nagpabilin pa sa kabukiran, mo-surrender na.
“Parehas ratang tanan Pilipino ug dili kita angayan makig-away sa parehas nato nga Pilipino,” dugang sa Gobernador.
Sa iyang pakigpulong, si Major General Andres Centino, ang Commanding Officer sa 4th Infantry Division, Philippine Army miingon nga kini nga mga lakang gihimo sa gobyerno aron kadtong mga igsoo-on nato nga naa pa karon sa kalihukan, maaghat nato nga mo-surender na.
“Kini nagpamatuod nga sinsero ug tinud-anay ang gihimo sa atong gobyerno aron ma-angkon ang kalinaw nga atoong gitinguha,” matud ni MGen Centino.
Tungod ini, si Michael Lumawag, kanhi Political Instructor sa North Central Mindanao Regional Committee sa CPP-NPA nag-awhag sa uban pang mga rebelde nga mo-surender na aron makapanginabuhi sila nga malinawon.
“Nanawagan ko sa akong mga kauban nga nagpabilin pa sa pag suporta ug pag-uban sa kalihokan nga CPP-NPA nga unta mo-surender na kay ang gobyerno andam mosuporta ug motabang kanato aron mahapsay atong kinabuhi" (BGEpan/PIA-Bukidnon)
No comments:
Post a Comment
Note: Only a member of this blog may post a comment.