Wednesday, March 6, 2019

Cebuano PR: Pulong-pulong batok terorismo gitambungan sa 230 ka mga indibidwal sa Surigao Norte

Posted to the Philippine Information Agency Website (Mar 6, 2019): Cebuano PR: Pulong-pulong batok terorismo gitambungan sa 230 ka mga indibidwal sa Surigao Norte

SURIGAO CITY, Surigao del Norte -- Nakigpulong bag-uhay pa lamang ang kapulisan sa Gigaquit sa pagpanguna ni Police Inspector Jay Bayeta ngadto sa kapin 230 ka mga mulupyo sa Barangay Camam-onan, Gigaquit, Surigao del Norte nga mitambong sa usa ka seminar nga gipahigayon sa Bravo Company sa 30IB, Philippine Army.

Sa maong pakigpulong, gihangyo ni Inspector Bayeta ang mga mitambong nga naglakip sa mga lumad ang paghunong na sa away ug hinuon, ipatigbabaw ang kalinaw para sa kalambuan sa lugar.

Sa maong tigum, gidasunan usab ni PO3 Ariel E. Esperon, imbestigador sa Gigaquit Police Station, ang paghisgot kalabot sa hulga sa terorismo aron makab-ot ang tinuod nga kalinaw ug kalambuan.

Gipasabot ni Esperon ngadto sa katawhan ang balaod nga Republic Act 9372 kun Human Security Act ug ang Republic Act 10168 kun Terrorism Financing Prevention and Suppression.

Subay sa maong balaod, ang terorismo mahimo ni bisan kinsa nga tawo nga makabuhat sa krimen nga rebelyon, insureksyon, pagpatay, pagpandagit ug pagpangsunog nga nagmugna og malukpanon nga kahadlok/kalisang sa katawhan aron pugson ang gobyerno sa ilang demanda nga dakong supak sa balaod ug ang pagpondo o paghatag og suporta materyal o salapi aron gastuhon o gamiton sa mga buhat sa terorismo pagasilotan sa balaod.

Sa katuyuan nga dili na mudagsang kining problema sa terorismo, gawas sa grupong Abu Sayyaf, gideklara usab ni Pangulong Rodrigo Duterte nga terorista ang pundok nga New People's Army (NPA) pinaagi sa Proclamation No. 374, s. 2017. Ang mga mitambong lanog kaayong mitingog nga adunay mga hulga sa terorismo nga nahitabo sa lugar og kini binuhatan sa NPA nga dugay na usab nga gihinganlang terorista sa Estados Unidos.

Gipasabot usab ni Esperon ang katawhan sa Camam-onan nga kung sila magsuporta sa teroristang grupo, mapa-pinansyal man o materyal sama sa pagkaon o sud-an o ba kaha mutabang aron mapahimuslan ang mga materyal o pinansyal nga tabang, sila mamahimong makasuhan sa paglapas sa R.A. 10168 diin adunay silot nga dili muminos sa 17 ka tuig ngadto 40 ka tuig nga pagkabilanggo ug multa nga tunga sa milyon ngadto usa ka milyon ka pesos.

Gipakita usab ni Esperon sa mga mitambong ang mga hulagway sa terorismo ug ang epekto niini ngadto sa ekonomiya, kapanginabuhian ug sa kinatibuk-an, sa kalinaw ug kalambuan.

https://pia.gov.ph/news/articles/1019331

No comments:

Post a Comment

Note: Only a member of this blog may post a comment.