Thursday, October 12, 2017

CPP/NPA-Cental Negros: Bayaran nga Organisadong Sindikatong Grupo nila Jim Paul D. Elizalde, Jerry Gepullano kag Roy Flores, mga Kabutigan Ginbayaran

NPA-Central Negros propaganda statement posted to the Communist Party of the Philippines Website (Oct 10): Bayaran nga Organisadong Sindikatong Grupo nila Jim Paul D. Elizalde, Jerry Gepullano kag Roy Flores, mga Kabutigan Ginbayaran

JB Regalado, Spokesperson
NPA-Central Negros (Leonardo Panaligan Command)

10 October 2017
Press Release

Wala kamatuoran nga naka-istorya ang NPA kay Spo1 Joshua Barili sa isa ka Food Shop sa Bacolod City sadtong July 2017 upod kay Albert Lacerna alyas Ka Ambit nga kuno District Commander sang NPA sa Central Negros paagi sa bulig sang isa ka beterano kag bantog nga mediaman kag journalista nga si Mr. Edgar Cadagat.

Una, wala sa patakaran sang NPA ang pagpakig-istorya kay bisan sin-o man sa mga pangpubliko nga mga lugar pareho sang isa ka kalan-an sa Bacolod City. Wala man sa patakaran sang NPA nga bisan sin-o lang ang magtaytay kag mag-istorya sa mga indibidwal ilabe na sa mga elemento sang kaaway kaangay ni Spo1 Joshua Barili nga wala sang organisado, solido kag kolektibo nga kasugot. Wala gid sa roster sang NPA ang nagahingalan nga si Albert Lacerna alyas Ka Ambit nga nagatindog nga opisyal kag kumander sang NPA sa Central Negros.

Sin-o man nga gusto makigsugilanon sa NPA dapat mag-adoptar kag magsunod siya sa mga patakaran kag palisiya sang NPA angot sa sini nga mga hambalanon. SOP na sa NPA nga ginatigayon sa sulod sang baseng masa kag sakop sang teritoryo sang NPA kag rebolusyonaryong hublag ang pagpakig-istorya pareho ni Barili kag iban pa nga elemento sang kaaway nga gusto mag-angot sa NPA. Ini hugot nga ginasunod kag indi basta-basta nga lapason sang bisan sin-o man nga elemento sang NPA ang 3 ka disiplina kag 8 ka punto nga nabalhag sa pagsulundan sang NPA ilabe na ang una nga disiplina nga “Sundon ang Tanan nga Mando sa Paghulag.”

Ikaduha, kabutigan man nga naghatag sang mga nagkalain-lain nga mga armas si Spo1 Joshua Barili kaangay sang M16, M14, AK47, handguns kag iban pa nga assorted ammunitions sa NPA paagi kay Albert Lacerna. Wala man kamatuoran nga ginhatag ni Barili ang M72-LAW System ukon mini-bazooka sa NPA nga sa diin suno nila Jim Paul Elizalde, Jerry Gepullano kag Roy Flores sa ila open statement sa print media sadtong Oktubre 5, 2017, ini nga mga armas kag bala gingamit sang NPA sa pag-ambus sa PNP Guihulngan nga gintaliwan sang 6 ka mga kapulisan ilabe na ni PSupt. Arnel Arpon kag pagkapilas pa sang 3 pa ka iban. Hugot man ginapatuman kag ginasunod sang NPA ang disiplina nga “Ang Tanan nga Nakumpiska, I-sentralisa kay Partido ang Magtalana.”

Isa ini ka “heresy” ukon indi mapatihan nga mga palayag sa publiko. Tuyo lang sang 3 (Elizalde, Gepullano kag Flores) nga i-angot si Spo1 Joshua Barili sa NPA kag dugangan ang mga kuno nakomiter nga krimen ni Barili sa reaksyunaryong estado. Gusto man sang 3 nga ilupot sa prisohan si Barili para pahipuson sa ila mga illegal kag organisadong sindikato nga mga aktibidad. Dugang pa nga gusto man nila nga i-angot si Cadagat kay Barili kag sa NPA.

Sila Elizalde, Gepullano kag Flores daw mga idu-buang nga ginpataghol sang mga pabrikado nga mga palayag batok kay Barili kag Cadagat sa mando sang AFP, PNP, NBI kag PDEA katumbas sang kantidad sang kwarta bilang bayad sa ila ni Mayor Magdaleno “Magsie” Peña sang Moises Padilla, Negros Occidental.

Matuod man nga dapat maghalong ang AFP, PNP kag iban pa nga mga state security forces sa ila pagpang-atake sa mga yunit sang NPA tungod indi lang Light Anti-Tank Weapon System ang armas sang NPA kundi may mga masobra pa.

Bisan ang US-Duterte nga rehimen angot sa iya ginalunsar nga gyera kag kampanya kontra-druga, kontra-terorismo kag kontra-insurhensiya idalom sang US-CIA Oplan Kapayapaan, dapat maghalong man indi lang sa NPA kundi sa malapad nga masa sang pumuluyo diin amo ang tunay nga baganihan kag tagtuga sang kasaysayan.

Samtang ang mga bayaran kag organisadong sindikato nga mga grupo kaangay nila Jim Paul Elizalde, Jerry Gepullano kag Roy Flores nga matuod imbolbado sa mga kontra-sosyal nga gawi, gun for hire, tunay nga nagahatag proteksyon sa pagbaligya sang illegal nga druga kag iban pa nga mga sinindikato, illegal nga mga aktibidad kag mga kontra-pumuluyo nga mga kalakasan kag kagarukan ni Mayor Magdaleno “Magsie” Peña.

Ang LPC-NPA indi gid mag-untat lagas sa inyo. Mangatubang kamo sang nagakaigo nga silot matapos nga mapamatud-an sang Korte sang Pumuluyo sa proseso sang pagbista ang kabug-aton sang kaso nga inyo nakomiter.

No comments:

Post a Comment

Note: Only a member of this blog may post a comment.