NDF-Northeastern Mindanao propaganda statement posted to the Communist Party of the Philippines Website (Jul 24): Sona ug Ekstensyon sa Martial Law ni Duterte Angay lang nga Gisugat sa Kaylap nga mga Protesta ug Pagsukol
Ka Maria Malaya, Spokesperson
NDFP Northeastern Mindanao
24 July 2017
SONA UG EKSTENSYON SA MARTIAL LAW NI DUTERTE ANGAY LANG NGA GISUGAT SA KAYLAP NGA MGA PROTESTA UG PAGSUKOL
Alang sa NDFP – NEMR, tukma lang nga gisugat sa kaylap nga mga protesta sa katawhan sa tibuok nasud ang SONA (state of the nation address) ni Duterte aron paninglon sa iyang mga saad ug papanubagon sa iyang mga kadaut nga gimugna ngadto sa katawhang Pilipino ug Moro bunga sa duguong kampanyang pagpanumpo. Angay lang usab nga gilunsad ug ilunsad pa ang hiniusa ug malukpanong pagsukol sa katawhan ug rebolusyonaryong pwersa pinaagi sa tanang porma sa pakigbisog (armado o dili) batok sa ekstensyon sa bangis nga martial law sa Mindanao ug sa hulga niining ipahamtang sa tibuok nasud.
Ang ikaduhang SONA ni Duterte niining Hulyo 24, 2017 susama gihapon sa mga nangagi, giputos sa pasiatab ug walay katumanan nga mga saad ang katawhan. Walay unod sa mga yaweng programa nga mosulbad sa mga batakang problema sa nasud. Mas nagbansiwag kanunay nga malitok ni Duterte ang pangsaywar ug paggamit sa kabangis aron sulbaron ang mga katilingbanong problema. Kun ang ubang presidente nakaako sa panghambog nga milambo ang nasud sa ilang termino apan sa SONA ni Duterte wala kini makaako sa paglitok nga milambo ang panginabuhian sa katawhang Pilipino sulod sa iyang usa ka tuig.
Sama sa mga nangaging rehimen walay sarang ikapasiatab ang rehimeng Duterte. Ang usa ka tuig niini puno sa panglingla, kabangis ug kawad-on. Wala pay natagamtaman sa rehiyon ug sa tibuok nasud ilabina sa mga mag-uuma, mamumuo, kabus sa syudad ug mga nasudnong minorya sa kausaban nga iyang gisaad gawas sa nagkasamot nga kalisod sa panginabuhian ug kalisang tungod sa iyang binangis nga pagdumala. Imbis siya pa ang unang presidente nga gikan sa Mindanao, siya pa ang nakaako sa paggun-ob sa Marawi City, nagpaantus sa kapin 400,000 ka Moro, ug nipatay sa kapin 10,000 ka tawo sa tibuok nasud sa iyang gubat kontra-ilegal druga, Oplan Kapayapaan nga todo gera, ug martial law sa Mindanao. Mas giamoma pa ni Duterte ang iyang militar ug polis nga gipaborang mohimo og mga pagpanglapas, kay sa kaayuhan sa katawhan ug sa gatusan ka libo nga biktima sa iyang mga teror nga kampanya. Gihupay-hupay lang ni Duterte ang katawhan sa iyang mga pinulitikong pagpangatik.
Partikular sa NEMR, mosubra sa 2000 ka mga mamumuo ug mga lider sa unyon ang napalagpot sa trabaho ilabina sa mga minahan, dili tungod kay nasirhan ang kompanya, apan tungod kay nagtukod og unyon ug nanghingusog nga ma-regular ang mga mamumuo kay dugay nang nagtrabaho isip kontraktwal. Samtang ang mga mag-uuma ug mga Lumad padayong nag-antus kay giilogan og yuta alang sa ekspansyon sa plantasyon ug minahan. Ang mga katawhan nga nakigbisog sa rehiyon ang gitarget sa pagpanghulga, pagpamitol ug pagpamatay ilabina ang ilang mga lider.
Samtang sa pikas bahin, ubos sa rehimeng Duterte nagsadya ang mga imperyalista, mga dagkung burgesyang kumprador ug agalong yutaan ilabina sa mga kaalyado ug suod niini sa pagpanghakop sa dagkung kita gikan sa pagpahimulos sa kusog sa katawhan ug pagkawkaw sa kinaiyanhong bahandi sa nasud. Pananglit, gihulga tuod nga pasirhan ni Duterte ang pila ka makadaut nga dagkung minahan sa rehiyon apan gitugutang magpadayon sa pag-operit ang Taganito Mining Corporation ug THPAL sa SDN tungod kay ang tag-iya niini naggasto sa iyang kampanya panahon sa eleksyon. Ang mga pulitiko sa rehiyon nga may interes sa mina daling midikit kang Duterte aron magpadayon ang operisyon sa ilang minahan.
Nagkisi-kisi na usab kini sila alang sa pagtukod ug ekspansyon sa mga makadaut nga plantasyon sa oil palm, rubber, saging ubp, ug sa operisyon sa dugang minahan sulod sa mga kayutaan sa NEMR nga gi-award na sa gobyerno ug dugay nang gimilitarisa. Sila ang labing nabulahan sa pagpadayong pagsunod sa rehimeng Duterte sa ekonomikanhong palisiyang “ libreng pamatigayon” o neoliberalismo nga labi pang naghikot sa ekonomiya sa Pilipinas ngadto sa pagkaatrasado. Sila usab ang mabulahan sa dagkung mga proyekto ni Duterte ug sa rehabilitasyon sa nagun-ob nga syudad sa Marawi. Normal lang nga daghang mga pulitiko nga mobalimbing ngadto sa kampo ni Duterte aron ipreserba ang ilang interes.
Nagkatataw ang pagkamasunuron sa rehimeng Duterte sa pangkalibutang eskema sa imperyalistang U.S. sama sa pakaaron-ingnong gubat-batok terorismo ug sa pagpadayon sa mga dili patas nga mga kasabutan. Walay kausaban sa iyang palisiyang panggawas, ang pagsupak niya sa US kutob lang sa pulong aron makakuha og pautang sa ubang imperyalistang nasud nga ikapundo sa iyang dagkung proyektong imprastraktura nga gusto niining daliong ipatuman.
Nahimong naandan na ni Duterte nga direktang manghulga ug manghasi ni bisan kinsang mosaway kaniya ug sa iyang mga palisiya. Imbis tubagon ang mga ugat hinungdan sa kalisod sa katawhang Pilipino, misentro kini sa kaylap nga pagpamatay sa mga kabus nga biktima sa druga ug wala gitandog ang mga druglords. Inay ugkaton ang gamut hinungdan sa gubat sibil pinaagi sa seryosong panaghisgot pangkalinaw tali sa NDFP ug GRP, giliwag hinoon sa pagpasurender ang mga rebolusyonaryong pwersa. Dili usab tinuod nga wala giatake sa AFP ang BHB ug katawhan dungan sa iyang pagpanulong sa Marawi City o atol sa pagdeklara sa martial law. Obligado ang BHB sa paglunsad og mga kontra –atake batok sa walay hunong nga militarisasyon sa kabukiran ug panalipdan ang interes sa katawhan. Busa dili bisan kanus-a man mahulga ang rebolusyonaryong pwersa nga isunod sa pag-atake human sa Marawi.
Tungod kay pakyas siya nga pasundon sa iyang gusto ang CPP,BHB ug NDFP ug misibaw pa ang armadong pagsukol sa Moro mas gipili niining lugwayan ang martial law sa Mindanao ubos gihapon sa pakaaron-ingnong gubat batok terorismo ug gikansela ang peacetalks. Sumala sa gidahom na, napalig-on ang duso sa rehimeng Duterte sa ekstensyon sa martial law sa Mindanao kutob sa Disyembre 31, 2017 pinaagi sa hiniusang sesyon sa senado ug kongreso niadtong Hulyo 22.
Ang ekstensyon sa martial law sa Mindanao moaghat pa sa mas grabeng pasistang pagpangatake ngadto sa katawhan ug sa rebolusyonaryong pwersa. Manipestasyon na kini nga ipahamtang ang pagharing militar sa tibuok nasud nga sama kang Marcos o labaw pa kabangis niini. Gawas pa, magamit usab niya ang martial law batok sa iyang mga karibal sa han-ay sa mga nagharing hut-ong aron mamonopolyo ug makapabilin siya sa gahum.
Bisan sa yugto pa lang sa pagpalanog sa rehimeng Duterte nga lugwayan ang martial law sa Mindanao, gisugat na kini sa mga pagsupak sa katawhan ug sunod-sunod nga mga aksyong militar sa BHB –NEMR ug sa tibuok nasud. Mokabat na sa 35 ka nagkalainlaing porma sa mga aksyong militar ang nalunsad sa BHB-NEMR batok sa mga pwersa sa AFP/PNP ug sa mga mapahimuslanong hut-ong sukad gideklara ang martial law sa Mindanao. Sa adlaw sa SONA, nakalunsad ang BHB-NEMR og mga harasment nga nakapatay kang Sgt. Ebdane sa 36th IB didto sa Pandanon, Tandag, Surigao del Sur.
Mas gisugnuran karon sa rehimeng Duterte ang nag-umido nga kasuko sa katawhan tungod sa kaylap nga kapobrehon, sa walay katumanan nga saad ug bangis nga pagpanumpo, ngadto sa madilaubong pagsukol aron kab-uton ang ilang makihut-ong ug sektoral nga pangayo pinaagi sa ilang kauglingong kusog.
Nag-awhag ang NDFP-NEMR nga hugtanong maghiusa ang tanang sektor ug hut-ong ilabina ang han-ay sa mga relihiyoso nga batukan ang nagkuyanap nga pasistang pagpanumpo, pagpamatay ug babagan ang hulga sa pagpabarug balik sa diktadurang paghari sa nasud.
Padayong ilunsad ang kaylap ug subsob nga mga taktikal nga opensiba batok sa bangis nga pagpangatake sa mga pwersa sa AFP/PNP ug sa pagpahimulos sa mga nagharing hut-ong aron mapanalipdan ang interes sa katawhan. Pursigidong iasdang ang gubat sa katawhan aron matubag ang nasudnon- demokratikong tinguha sa katawhang Pilipino.
No comments:
Post a Comment
Note: Only a member of this blog may post a comment.