CPP/NPA-Central Negros: Hustisya! Singgit sang Pamilya Calago para kay Enric kag Rosalie Calago

New People's Army-Central Negros propaganda statement posted to the Communist Party of the Philippines Website (May 24): Hustisya! Singgit sang Pamilya Calago para kay Enric kag Rosalie Calago

JB Regalado, Spokesperson
NPA-Central Negros (Leonardo Panaligan Command)

24 May 2017

Si Enric kag Rosalie Calago mag-asawa kag lunsay mga Brgy. Officials sa Brgy Tacpao, Guihulngan City, Negros Oriental. Ang mag-asawa nga Calago brutal nga ginpatay sang mga katapo sang 11th IBPA sadtong Mayo 24, 2015 paagi sa pagmasaker, pagtiro kag pagsunog sang ila kaugalingon nga puluy-an upod ang 2 ka lawas sang biktima, mga alas 10:00 sang kagab-ihon. Halos 2 na ka tuig ang nagligad wala sang hustisya. Subong man ang AFP wala sang nagakaigo nga sabat sa pihak sang ginasinggit kag ginapangayo sang mga pamilya sang biktima nga diin maagum ang tunay nga hustisya sa kamatayon sang mag-asawa nga Enric kag Rosalie Calago.

Sa baylo tuyo pa sang militar nga baliskaron ang mga panghitabo kag ipasibangud pa sa NPA ang ini nga mga kalakasan sang AFP. Si Enric kag Rosalie lunsay mga maayo kag respitado nga mga Brgy Opisyal sa ila kaugalingon nga lugar kag bug-os nga syudad sang Guihulngan. Wala gid sang rason nga himuon sang NPA ang pagpatay sa mag-asawa sa pihak nga ang AFP lang man ang may kapasidad sa pareho sini nga mga kinaiya sang kalakasan.

Preska pa sa huna-huna sang 2 ka anak sang mag-asawa nga Calago ang natabo sa brutal nga pagpatay sa ila mga ginikanan sang 11th IBPA sa sityo Bantayan, Brgy Tacpao sakop sang Guihulngan City, Negros Oriental. Dugang pa ang pagmasaker man sang 11th IBPA sa pamilya Pableo sa Brgy Panubigan, Canlaon City nga sa subong ang mga biktima amo pa ang nag-antus sa prisohan sa diin sila pa ang ginmasaker, may napatay sa ila katapo sa pamilya kag may mga nasamaran. Amo man ang pamilya ni Toto “Rene” Quirante halos 7 na ka tuig wala gihapon sang hustisya ang ginhimo nga pagpatay sang 11th IBPA sa kay Toto Quirante sadtong October 2010.

Karon Mayo 21, 2017 liwat naman nga naglapta sang ila pasista nga mga kalakasan ang 79th IBPA, 303rd BdePA upod sa wanted criminal nga si Lionel Librado alyas “Dennis” or “Ramsie” sa pagpangransak sa puluy-an ni Bobby Gemodo kag nagtaya sang ila mga armas sa lima ka mga inosente nga mga kabataan sini sa sityo Agpapataw, Brgy Binobohan, Guihulngan City. Kadungan man sini ang ilegal nga pag-aresto sa mag-utod nga sila Vivian Tormis kag Nemesio Tormis sa nasambit gihapon nga lugar. Masubo pa sini kay pilit sang AFP ang pagpaako sa ila nga 2 nga mga katapo sang NPA matapos sang malawig nga interogasyon sa atubang ni Lionel Librado, sa pihak nga lunsay inosente nga mga mangunguma. Pilit man sila nga pasurenderon kag ginapilit pa gid nga pasudlon sa CLIP program sang militar iadalum sa Oplan Kapayapaan. Gina-enganyo sang AFP ang mag-utod nga magsurender para ma-claim sang mag-utod ang kuno P65,000.00 para sa ila nga livelihood nga wala man ginahangyo sang mag-utod nga Tormis upod sa ila pamilya.

Kon indi mahatag ang tunay nga hustisya sang reaksyunaryong gobyerno paagi sa bag-ong rehimeng Duterte ang ginapangayo sang pamilya sang mga biktima, ang rebolusyonaryong kahublagan paagi sa CPP/NPA handa maghatag sang nagakaigo nga hustisya sa mga biktima.

Ginapanawagan sa tanan nga yunit sang NPA idalum sa LPC nga himuon ang tanan nga mga tikang sa paglunsar sang mga aksyon militar tanda sa pagsilot sa AFP kaangot sa ila ginapanghimo nga mga kalakasan sa Central Negros. Ginapanawagan man ang tanan nga rebolusyonaryong masa ilabe na sa mga mangunguma, nahanunga kag demokratikong pwersa nga paslawon ang pasismo nga ginahimo sang militar ilabe na ang 303rd BdePA, 79th IBPA kag 3IDPA. Silotan man si Lionel Librado alyas “Dennis” or “Ramsie”.

Paslawon ang Oplan Kapayapaan sang AFP kag Rehimeng Duterte!
Pamatukan kag paslawon ang Counter-Insurgency sang US-CIA!
Suportahon ang Peacetalks!

https://www.philippinerevolution.info/statements/20170524-hustisya-singgit-sang-pamilya-calago-para-kay-enric-kag-rosalie-calago