Waray News: Aktibista nga nag-NPA nagsurrender dara han kakurian ha igbaw

From the Philippine Information Agency (Jan 6, 2020): Waray News: Aktibista nga nag-NPA nagsurrender dara han kakurian ha igbaw (By Nimfa Iluminada B. Quirante)

BORONGAN CITY, Ika 6 han Enero, 2021 (PIA)—Usa na naman nga kaapi han NPA nga taga Borongan City, E. Samar in nag-surrender.

Pamilya an naghatag hin kusog kan Ka Jerry/Laila aka Sherry Mae nga mag surrender ha mga otoridad.

Han ika-5 han Enero, yana nga bag-o nga tuig ha usa nga press conference ha National Press Club ha Intramuros, umatubang hi Sherry Mae ha taga mantalaan ngan mga miembros han StratCom Cluster han Task Force –End Local Communist Armed Conflict (TF-ELCAC).

Kaupod niya an iya mga kag-anak, mga mga kag-anak han Hands-Off Our Children ngan mga opisyales han PCOO ha pangunguna ni USec Joel Egco.

Ha pagyakan han aktibista nga naging-NPA, tuig 2015 han hiya in mag-full time ka NPA. Nag eskoyla hiya ha Polytechnique University of the Philippines (PUP) ngan naging aktibista hiya, bata pa hiya andam sumulod hin bisan ano.

Han iya paging full time NPA na, sinagka na hira han kabukiran ngan kagugub-an han Abra, Ilocos, Cordillera, didto hiya naging usa nga sundalo nga armado.

Makuri daw an ira hinmumutangan didto, agsob an ira enkwentro han kanan estado sundalo, an ira daw nabubuhat paglinihay-lihay, namatayan hiya han iya sangkay, nagpipinalagiw hira kay ginsisikop naman hira han mga sundalo.

Inabat daw hiya hin butlaw, butlaw ha lawas, ngan butlaw ha panhuna-huna.

Daw waray man pagbag-o han ira sitwasyon, nagdesisyon hiya pagtawag han iya pamilya, labi na nga inabat na hiya nga nadako na an iya ginsasagpon. Usa gihapon nga NPA an tatay. Pag-kukurii daw ha iya nahuinunumdom hiya han iya pamilya.

Dugang na nga naka-aghat han iya pagmalabaya an iya bata, para ha iya, waray sala han bata nga madako han sugad nga kamutangan.

Kun higagawas daw hiya, may tsansa han bata mabuhi hin tuhay. Karuyag na daw niya may kalinaw han iya huna-huna.

Nagyakan hiya ha mga nanay nga aadto pa ha kagiusan an mga anak, makuri daw pag aghat ha ira nga umuli pero maka-usa hira manhuhuna huna pag-uli, pareho ha iya.

Ha iya pagtawag kanda iya nanay ngan tatay, waray magkawang hin oras hi Tatay Rudy pagtawag kan Gov. Ben Evardone pag-aro hin bulig, dayon gin-contact nira an mga army officials sugad kanda Lt. Col. Oliver Arviol ngan BGen. Audrey Pasia an bumulig nga makuha nira hi Sherry Mae.

Han ika-4 han Enero, pinahuram ni Borongan Mayor Dayan Agda hin sarakyan an magti-ayon pagkuha han ira anak ha Bangued, Abra.

Para han nanay ni Sherry, usa nga malipayon nga bag-o nga tuig an nahitabo. Sumala ha iya kada gab-i hiya nagtatangis, nag-aampo nga umuli na an iya suhag nga anak

Hi Tatay Rudy naman in nahinga-tangis gihapon nga mauli na an iya anak ngan makakaupod na nira, duro an iya pasalamat kan Gov. Evardone, Mayor Agda, LtCol Alvior, BGen Pasia nga bumulig hin dako ha ira pamilya.

Dida gihapon han press conference, nanawagan an mga opisyales han Hands-Odd Our Children ha mga kag-anak nga bantayan an ira kabataan.

Sugad man nanawagan gihapon hi Chan-chan nga anay NPA nga narekupo han mga sundalo ha Northern Samar para han ira anay mga ka-usa nga lumugsong na ngan umatubang hin mas mahayag nga kabubuwason ngan matagamtaman an mga ayuda han gobyerno.

Para naman kan Mayor Agda, andam daw hiya humatag empleyo kan Sherry basi umabat ini nga na suporta an LGU Borongan han TF ELCAC. (nbq/PIA E. Samar)

https://pia.gov.ph/news/articles/1063161