CPP/NPA-FSM ROC: Sistematikong kampanyang red-tagging ug pugos nga pagpanurender; raket sa pagpangwarta, kabahin sa implementasyon sa Anti-Terror Law

Propaganda statement posted to the Communist Party of the Philippines (CPP) Website (Dec 8, 2020): Sistematikong kampanyang red-tagging ug pugos nga pagpanurender; raket sa pagpangwarta, kabahin sa implementasyon sa Anti-Terror Law

GARY ANGELES | SPOKESPERSON

FAR SOUTH MINDANAO REGIONAL OPERATIONAL COMMAND

VALENTIN PALAMINE COMMAND

NEW PEOPLE'S ARMY

DECEMBER 08, 2020

Desperado ang militar ug ang rehimeng US- Duterte sa sistematikong kampanyang red-tagging sa mga progresibong organisasyon ug mga indibidwal nga nagapasibaw sa ilang katungod bisan mga iladong artista ug sa pugos nga pagpasurender aron ikondisyon ang panghuna-huna sa publiko isip kabahin sa implementasyon sa Anti-Terror Law nga gidali-dali og pasa sa kongreso taliwala sa atake sa pandemyang COVID19.

Buot nilang ilaron ang katawhan nga kining mga legal nga organisasyon, nga makanunayong nagasaway sa mga dili malilong nga kapalpakan ni Duterte partikular sa dili siyentipiko ug busa, dili epektibong mga lakang sa pag-atubang sa COVID19, pagpangandam sa katalagman sama sa linog ug bagyo nga bago lang miigo sa nasud ug paghatag og hinanaling pagtabang sa mga biktima niini, mga ligal nga prente lang sa NPA, nga ginapasanginlan usab nga teroristang organisasyon.

Sumpay niini ang usa pa ka modus operandi nga pagparada og mga masa isip mga NPA nga “nagsurender” ug nagpailalom sa programang amnestiya sa National Task-Force to End Local Communist Armed Conflict (NTF-ELCAC) ug “makadawat” og hinabang gikan sa gobyerno ilalom sa programang Enhanced Comprehensive Local Integration Program (E-CLIP). Apan kini usa ka raket-pangwarta lang. Pananglitan, sa South Cotabato, halos magbalay – balay na ang mga ahente sa Office of the Presidential Adviser on the Peace Process (OPAPP) sa pakigtinabangay sa lokal nga panggamhanan sa probinsya aron mangita og potensyal nga mapasurender. Hatagan nila og P25,000 matag “surrenderee” ug ibulsa sa OPAPP ug sa opisina sa gobernador isip nangulo sa NTF-ELCAC ang nahabiling P125,000 gikan sa orihinal nga P150,000 nga gipasalig nga alokasyon sa matag “surrenderee”. Sumpay sa maong raket, bisan mga sitio leader ginaapil isip surrenderee aron makuha ang budget alang dinhi, recycled surrenderees aron mapangwartahan sa daghang higayon, senior citizens ug uban pang pekeng mga surrenderee aron makapuga og dakung badyet nga makurakot gikan sa kwarta sa katawhan.

Sa Sultan Kudarat, partikular sa Sitio Kiwag, Brgy, Salangsang, sa Lebak, 71 ka tao ang pugos nga gipasurender ug gi-hamlet sa usa ka lugar human gipasaligan og “housing project” apan trapal lang para sa atop ang gihatag ug pugos nga gipatrabaho sa nursery sa kahoy nga alang sa plantasyon sa pamilyang Consunji. Raket kini sa 6th IB sa Philippine Army ug IPMR sa Lebak nga si Renz Apang aron mahakop ang badyet gikan NTF-ELCAC. Samtang aduna pud mga kaso nga ginahatagan lang og grocery goods ang mga “surrenderee”.

Sa Sarangani, ginapresenta sa 73rd IB PA ang pila ka mga tao nga adunay mga kasong kriminal nga ilang nakumbinsi nga mosurender isip mga NPA ug ”benepisyaryo” sa E-CLIP apan walay nadawat tungod kay gibulsa sa 73rd IB PA ang badyet tungod kay ang pasalig, “limpyohon” ang kaso sa maong mga tao.

Samtang sa North Cotabato ug Davao del Sur, ginatanyagan sa mga ahente sa OPAPP ug 39th IB PA, ang mga opisyal sa lokal nga panggamhanan hangtud sa mga barangay og P20 milyon isip bugti sa mga proyekto ug rehabilitasyon sa mga nabiktima sa linog. Apan mapagawas lang kini kung makab-ot ang kota nga gitakda sa ilaha nga mapasurender nga “NPA” sa ilang barangay. Tungod niini, bisan mga barangay, tanod, mga opisyal sa barangay ug bisan mga bata ginapresenta isip mga nagsurender nga NPA.

Nagpamatuod lamang kini sa korapsyon sa AFP nga ginagahinan og dakung porsyento sa national budget. Ang kampanya kontra -insurehensiya usa ka dakung gatasan lang aron makahakop og dakung kwarta ang taas na opisyal sa militar, OPAPP, NTF-ELCAC ug mga kakonsabo niining opisyal sa gobyerno. Kung mao, ang NTF-ELCAC gitukod isip dugang makinarya sa korapsyon.

Sa pikas bahin, tataw kaayo nga ginagamit lang ni Duterte ang pandemyang COVID19 aron itago ang mga teroristang atake niini sa katawhan. Dili layo ang posibilidad nga sa sunod nga mga adlaw mosunod na dayon ang proscription o petisyon sa korte nga ideklarang terorista kining mga ligal ug progresibong organisasyon ug CPP-NPA-NDF ug latuson dayon sa Anti-Terror Law.

Ginapasilaub lamang niini ang nagkalayong kasuko ug pagsukol sa katawhan nga daan nang nag-antus sa ekonomikanhon ug politikanhong krisis bisan wala pa man ang COVID19 ug gipasamot sa pa maong pandemya. Tugbangan kini og subsob nga mga taktikal nga opensiba sa NPA, samtang siguradong mokusog ug molapad nga mga kalihukang masa sa kasyudaran aron palagputon si Duterte sa ulahing tuig niini sa poder.

https://cpp.ph/statements/sistematikong-kampanyang-red-tagging-ug-pugos-nga-pagpanurender-raket-sa-pagpangwarta-kabahin-sa-implementasyon-sa-anti-terror-law/