Mag-asawa nga NPA Kumander (ikatulo ug ika-upat gikan sa tuo nga bahin sa larawan) ug lima ka kaubang lider ubos sa Guerilla Front 6 (GF6) ang mi-surender ngadto kang Valencia City mayor Azucena Huervas pinaagi sa tabang ni Cong. Rogelio Neil Roque ug ni barangay Banlag Kagawad Saliezer Dejos. (BSG/PIA Bukidnon)
VALENCIA CITY, Bukidnon, Jan. 16 (PIA) — Mi-surender ning mia-aging Huwebes ang magti-ayong Kumander sa NPA kon New People’s Army nga naglihok sa Southern Bukidnon.
Si Renante Tumbalang alyas “Jigger,” 37 anyos, nga Kumander sa NPA Guerilla Front 6 o gitawag nga “Bukidnon Command,” ug ang iyang asawa nga si Resylyn Pardo alyas “Jamby,” 28 anyos, nga Secretary General, Strategist, ug Planner sa CPP-NPA Guerilla Front 6, misurender pinaagi sa tabang ni Valencia City Mayor Azucena Huervas ug Cong. Rogelio Neil Roque, ubos sa paningkamot ni Barangay Banlag Kagawad Saliezer Dejos.
Sakop sa “Command” sa magti-ayong NPA Kumander ang syudad sa Valencia ug laing unom pa ka mga lungsod sa Bukidnon nga mao ang San Fernando, Kitaotao, Maramag, Don Carlos, Dangcagan, ug Quezon.
Gibutyag ni Resylyn alyas “Jamby” nga hinungdan sa ilang desisyon pag-surender mao ang pagka-ipit nila tungod sa walay hunong nga “offensive military operations.
Gawas sa pagkaipit nila sa sunod-sunod nga engkwentro, miingon si alyas Jamby nga naglisod na sila karon paglihok sa kabukiran tungod kay wala nay masa nga mi-suporta sa ilang kalihukan.
"Wala nay masa nga misuporta sa amo, bisan gani maghatag mi ug kwarta sa ila aron ipalit ug bugas para sa among konsumo dili na sila mosugot. Sa una, walay mga ahensya sa gobyerno nga mo-abot sa mga suok nga Barangay. Walay Health Center, walay saktong karsada. Mao nga dali ra namo ma-ilad ang mga kaigso-onan natong Lumad nga mo-apil sa among grupo. Apan sa pag sugod sa programang ELCAC, nasulod na sa gobyerno ang mga lagyo’ng Barangay ug nakatilaw na ang katawhan sa mga benipisyong gitagana para kanila. Sementado na ang mga dalan ug dali na nila mabahada ug ma deliver ang ilang mga abot. Ug didto na nag sugod ka hinay ang pwersa sa among Kilusan, miingon si Resylyn alyas ‘Jamby’ sa usa ka interbyu atol sa press conference.
Kini nga pamahayag gisegundahan sab sa iyang bana nga si Renante Tumbalang alyas ‘Jigger’ nga wala sila magduha-duha nga mo-surender tungod kay sa 16 na ka tuig nila sa kalihukan, wala daw silay na-ani. Busa sukad karon, gusto daw nilang manginabuhi nga malinawon kauban ang ilang pamilya.
Gawas aning duha ka magti-ayong kumander, naay lima pa ka mga kauban nila ang misurender, sila si:
1. Shairyl Pardo alyas “MG,” ang Squad leader sa Platoon Group, Sentro De Grabidad, GF6;
2. Roger Gonzales alyas “Narra,” ang Team Leader sa usa ka Platoon;
3. Regine Pardo alyas “Raya,” Platoon Leader sa Sandatahang Yunit Pangpropaganda-5 (SYP5);
4. Angelito Tundag alyas “Grob,” Vice Commanding Officer sa SYP5, GF6; ug si
5. Mark Jason Pardo alyas “Rassk,” ang Platoon Officer sa Sentro De Grabidad, GF6.
Gitug-an pud ni Resylyn alyas “Jamby,” nga ang 18 ka mga Kilusang Rebolusyonaryong Barangay (KRBs) kon kining gitawag nga “shadow government” nga iyang gimugna sulod sa unom ka mga lungsod ug usa ka syudad dinhi sa Bukidnon ang na-‘dismantle’ tungod sa pag-‘withdraw’ sa suporta sa mga nahimong miyembro.
Tungod niini, si Brigadier General Edgardo De Leon, ang 403rd Brigade Commander sa Bukidnon, miingon nga kining pag surender sa mag-asawa nga NPA Kumander, ug laing lima pa ka kauban nga mga NPA lider, dako kaayo ug epekto sa pagkabungkag sa komunistang kalihukan sa mga rebelde.
Dugang niya nga hagit usab kini para sa mga ahensya sa kagamhanan nga lumilihok sa ELCAC aron pakusgan pa ang paningkamot sa padayon nga pagsalig sa katawhan; ug aron nga ang desisyon sa katawhan sa pagsalikway sa NPA dili na gyod matandog o mabalhin. (RLRB/PIA Bukidnon)
https://pia.gov.ph/news/articles/1033036
No comments:
Post a Comment
Note: Only a member of this blog may post a comment.