Cebuano news: Dureza mibiya sa Pilipinas alang sa ‘global negotiators forum’ sa Norway

From the Philippine Information Agency (Jun 22): Cebuano news: Dureza mibiya sa Pilipinas alang sa ‘global negotiators forum’ sa Norway

Si Presidential Peace Adviser Jesus Dureza migikan sa Pilipinas Domingo sa gabi-e, Hunyo 17, paingon sa Europe alang sa ‘forum’ kauban ang mga kadagku-an kon ‘top global peace negotiators’.

Ang “Oslo Forum” gikatakda sa petsa 18 hangtud petsa 20 ning bulan sa Hunyo, 2018.

Kini nga ‘forum’ kon panaghisgot, ginapahigayon kada tulo ka tuig didto Oslo, ang kapital nga syudad sa Norway.

Niining tuiga, gi-imbitar si OPAPP chief Dureza aron makiglambigit sa hisgotanan sa nagkalain-laing isyu sa pagkab-ot sa kalinaw, labi na ang “sharing of experiences” sa mga tawo nga maoy nagtrabaho aron makab-ot ang kalinaw sa tibuok kalibutan.

Si Dureza, ang Philippine Peace Adviser, nakatakda usab nga makigkita sa bag-ong napili nga Norwegian Foreign Minister aron iyang mahatagan sa impormasyon kabahin sa mga panghitabo sa nasud sa Pilipinas ug aron pasalamatan ang Norway sa kusganon nga suporta niini alang sa mga paningkamot sa Pilipinas diha sa pagkab-ot sa kalinaw.

Ang Norway maoy ‘facilitator’ sa negosasyon sa kagamhanan kabahin sa kalinaw tali sa Communist Party of the Philippines tungod sa kusganong suporta sa nasud diha sa mga mekanismo sa isyu sa kalinaw sa Pilipinas.

Gibutyag ni Dureza nga sa petsa 21 sa Hunyo, makigtagbo sab siya sa mga Pilipino didto, pinaagi sa usa ka ‘town hall meeting’ sulod sa ‘Philippine Embassy’ nga nahimutang sa Oslo, Norway.

Kini, matud ni Dureza maoy kahigayonan nga iyang mapahibalo ang mga Pilipino didto kabahin sa sitwasyon ug mga kaayohan sa Pilipinas nga nahimo ubos sa administrasyon ni President Rodrigo Duterte.

Sa mao gihapon nga byahe, makigkita usab si Dureza sa mga ‘Filipino communities’ nga naa sa uban pang bahin sa Europe.

Sa samang higayon, matud ni Dureza nga gusto usab niya pakigkitaan si Kjarktan Sekkingstad, ang Norwegian nga iyang gitabangan nga malingkawas gikan sa mga kamot sa Abu Sayyaf ug makabalik kini sa iyang pamilya, mga duha ka tuig na ang milabay.

http://pia.gov.ph/news/articles/1009278