Tuesday, March 20, 2018

CPP/NDF-NCMR: Sa ika-50 ka tuig sa Jabidah Massacre, labaw pang pakusgon ang armadong pakigbisog!

NDF-North Central Mindanao Region propaganda statement posted to the Communist Party of the Philippines Website (Mar 18): Sa ika-50 ka tuig sa Jabidah Massacre, labaw pang pakusgon ang armadong pakigbisog!

Ka Cesar Renerio, Spokesperson
NDFP North Central Mindanao

18 March 2018
Press Release

Karong adlawa, Marso 18, 2018, pagahandumon sa katawhan ang ika-50 ka tuig sa mangilngig nga masaker sa mga kabatan-onang Moro sa Corregidor, ang Jabidah Massacre.

Kahinumdumang giresulta ang maong maduguong panghitabo sa kapalpak sa Oplan Merdeka nga sikretong giplano sa diktador nga si Ferdinand E. Marcos. Ubos sa maong oplan, giorganisa ang Jabidah expeditionary forces nga gilangkoban sa mga batan-ong Moro gikan sa Sulu aron sulungon ang Sabah ug bawion kini gikan sa Malaysia. Gisakyan ni Marcos ang istorikal nga territorial claim sa Sabah sa sultanato sa Sulu nga girepresentahan sa pamilyang Kiram aron mahakop ang abunda nga kinaiyanhong bahandi ug lagsik nga patigayon niini.

Naglaraw ang Oplan Merdeka dili pa aron makabaton og katungod sa kaugalingong paghukom ang katawhang Moro, kun dili aron palapdon ni Marcos ang eryang mapailalom sa diktadurya. Sa ingon, dako ang iyang mahanyag nga lunang kakuhaan og hilawíng materyales nga ikahungit ngadto sa mga imperyalistang pabrika ilabina sa US.

Sa usa ka testimonya sa nakaikyas sa maong masaker, nahimong mangilngig ug bangis ang maong masaker human nila gibutyag ang pagpamig-ot ug korapsyon sa mga opisyal nga nagbansay kanila. Inay, gipagrabe pa sa estado ang iyang terorismo pinaagi sa pagsunog sa mosque sa Buldon, Maguindanao niadtong Marso 22, 1970 ug sa pagmasaker 70 ka Moro sa Manili, Carmen, North Cotabato niadtong Hunyo 1971.

Karon, 50 ka tuig na ang milabay, apan daw gilubong lamang sa kalimot sa mga misunod nga mga administrasyon ang mulo sa katawhang Moro alang sa hustisya. Gani, labaw pang gisugnuran sa kasamtangang administrasyon ni Rodrigo Duterte ang kasilag sa katawhang Moro. Iyang gideklara ang balaod militar sa Mindanao niadtong Mayo 23, 2017 nga nakapunting sa katawhang Moro sa Marawi City, sa takuban sa kunuhay paglutos sa grupong Maute.

Todo-larga usab ang terorismo sa estado batok sa katawhang Filipino pinaagi sa pagbandera niini sa mangilngig nga kampanya sa pagpamatay. Lakip na niini ang walay-hunong nga pagpamatay sa mga aktibista pinaagi sa Oplan Kapayapaan ug sa mga gagmayíng drug users pinaagi sa Oplan Tokhang nga mokabat na karon og kapin 14,000 ang nabiktima. Tataw nga walay interes ang estado nga tuldukan ang teror, inay nagtinguha pa kining labaw pang lupigan ang katawhang Moro ug tanang nagabatok sa iyang pasismo.

Atol sa kasaulugan sa ika-200 ka tuig nga anibersaryo sa pagkatawo ni Karl Marx karong tuiga, nagapabiling balido ug makatarunganon ang iyang mga batakang prinsipyo. Bugtong kapilian sa katawhang nilupigan mao ang paggakos sa armadong pagsukol. Gitudlo kanato ni Marx ang komprehensibong pilosopiya ug tukmang estratehiya ug taktika sa pagbatok sa imperyalismo ug pagkab-ot sa sosyalismo. Ang Jabidah ug Buldon Massacres mga kongkretong dagway sa imperyalistang kabangis nga girepresentahan sa itoy niining si Marcos ug sa war crimes sa pagkakarong rehimeng Duterte diha sa paturagas nga pagpamomba sa komunidad sa mga Lumad ug Moro ug pagpamatay sa mga pulitikanhong aktibista.

Tataw kining makita sa pagsulbong sa armadong pakigbisog sa katawhang Moro pinaagi sa pagkatukod sa Moro National Liberation Front (MNLF) nga unang nagduso alang sa katungod sa kaugalingong paghukom sa Bangsamoro. Apan, napakyas ang MNLF sa pagkab-ot sa tinguha sa katawhang Moro tungod sa pakigkompromiso niini sa rehimeng US-Marcos ug hingpit nga napinalisa ang pakig-abin ilalom sa Tripoli Agreement sa rehimeng US- Ramos. Busa, mitumaw ang Moro Islamic Liberation Front (MILF) isip rebolusyonaryong pundok nga maisugong nakig-away sa reaksyunaryong estado. Sa dagan sa panahon, gikunsidera sa MILF ang pagsulod sa hisgutanang pangkalinaw tali sa gobyerno sa Pilipinas ug isurender ang ilang armas alang sa paghatag dalan sa Bangsamoro Basic Law (BBL), nga mao ang gilauman nga mohatag sa ilang katungod sa kaugalingong paghukom. Apan sa ato naíng nahisayran sa tibuok kasaysayan sa nasud, dahumon nato nga dili gayud ihatag sa estado ang maong katungod. Padayon lamang ginabandera sa rehimeng US-Duterte ang BBL, taliwala sa kahungog sa balaudnon, aron palabnawon ang pagsukol sa katawhang Moro. Busa, dili kalikayang motumaw ang lain-lain pang armadong grupo sa ilang han-ay.

Dugang pa, ubay-ubay na usab sa kasamtangan ang ihap sa katawhang Moro ang misagop sa pagkahusto sa armadong pakigbisog pinaagi sa giya sa Marxismo-Leninismo-Maoismo. Natukod ang Moro Revolutionary Liberation Organization (MRLO) isip tagong organisasyon sa mga rebolusyonaryong Moro. Aduna na usay ubay-ubay nga ihap kanila ang nagpasakop sa Partido Komunista ng Pilipinas. Ug labaw sa tanan, aron hingpit ipatuman ang pagpukan sa pulitikanhong gahum sa reaksyunaryong estado, pipila na usab kanila ang nag-armas kauban sa Bagong Hukbong Bayan.

Busa, nakighiusa ang National Democratic Front ñ North Central Mindanao Region sa katawhang Moro alang sa pagpaasdang sa armadong pakigbisog batok sa terorismo ug diskriminasyon sa estado ug sa labaw pang pagpakusog sa pakigbisog batok sa imperyalismong US.
https://www.philippinerevolution.info/statements/20180318-sa-ika-50-ka-tuig-sa-jabidah-massacre-labaw-pang-pakusgon-ang-armadong-pakigbisogrn

No comments:

Post a Comment

Note: Only a member of this blog may post a comment.