CPP/NDF-NEMR: Labaw Pang Pakusgon ang Gubat sa Katawhan

National Democratic Front propaganda statement posted to the Communist Party of the Philippines Website (Mar 29): Labaw Pang Pakusgon ang Gubat sa Katawhan (Intensify People's War)

NDFP Northeastern Mindanao

29 March 2017

Tigpamaba
NDFP-NEMR

Ang National Democratic Front of the Philippines – North Eastern Mindanao Region (NDFP-NEMR) miduyog sa tanang rebolusyonaryo sa pagpadangat sa pagsaludo ngadto sa Bagong Hukbong Bayan (BHB) atol sa iyang ika 48- nga kasumaran sa pagkatukod niadtong Marso 29, 1969. Mainitong nagpasidungog ang NDFP-NEMR sa walay kinutubang pag-alagad sa mga Pulang manggugubat ug kumander sa BHB nga nagapakita sa masukulong diwa ug kamamugnaon nga nakakab-ot sa mga mahinungdanong kalampusan sa pagpaasdang sa gubat sa katawhan.

Bililhon kini nga adlaw tungod kay natukod ang tinuod nga sundalo sa katawhan nga nagsilbeng hinagiban alang sa pagkab-ot sa kadaugan sa Demokratikong Rebolusyon sa Katawhan. Ubos sa absolutong pagpangulo sa Partido Komunista ng Pilipinas (PKP), padayong nagdaku ug milig-on ang pwersa sa BHB nga nakakatag sa tibuok kapupud-an. Nakapundar kini og pulitikanhong kusog ug nakakab-ot og hugot nga panaghiusa ngadto sa katawhan. Napamatud-an sa kasaysayan nga kun walay Bagong Hukbong Bayan, walay bisan unsang kusog ang katawhan.

Pinaagi sa BHB, uban sa katawhang nakigbisog, gipakyas ang mga kontra-rebolusyonaryong kampanya sa mga nangaging Presidente gikan kang Marcos hangtud kang Aquino III nga nagdamgo nga puohon ang rebolusyonaryong kalihukan. Sa hugot nga paghawid sa malungtarong gubat sa katawhan napataas niini ang opensibang diwa batok sa bangis nga operasyong militar sa AFP/PNP. Busa hangtud karon padayon ang mga malampusong taktikal nga opensibang gilunsad sa BHB. Milapad ang Pulang pulitikanhong gahum sa kabanikanhan, ug padayong nakakab-ot og mga kadaugan sa agraryong rebolusyon, samtang dugang milagsik usab ang pag-asdang sa demokratikong kalihukan sa kasyudaran.

Miarangkada karon ang rehimeng Duterte ug AFP/PNP sa iyang all-out –war o todo gera ug sa iyang bag-ong Oplan Kapayapaan o Development Support and Security Plan Kapayapaan. Ubos gihapon kini sa “kontra – insurhensyang” doktrina sa US nga nagtumong sa pagpukan sa nasudnong demokratikong pakigbisog dinhi sa Pilipinas. Busa gipadayon niini ang pagpasubsob sa mga operasyong militar gamit gihapon ang triad operations (kombat, paniktik ug saywar) ug ang pagpasurender. Ang Comprehensive Local Integration Program (CLIP) sa DILG mao ang bag-ong programa karon alang sa pagpasurender sa mga rebolusyonaryo ug sa mga membro sa BHB.

Ang padayong paggrabe sa mga operasyong militar sa AFP/PNP bunga sa todong gera niini batok sa BHB ug sa katawhan miresulta sa daghang kaso sa paglapas sa tawhanong katungod ilabina panghulga ug pagpamatay, dislokasyon sa pamuyo ug panginabuhi sa mga lumulupyo sa kabanikanhan. Mihikaw kini sa pag-asdang sa panaghisgot pangkalinaw ilabina sa hisgutanan sa katilingbanon ug ekonomikanhong reporma. Itukmod niini ug sa Oplan Kapayapaan padulong sa pagkapakyas ang panaghisgot pangkalinaw.

Sama sa Oplan Bayanihan, giputos sa maanindot nga mga pulong sa “kalinaw ug kalamboan” ang nabulit sa dugo nga kabangis sa Oplan Kapayapaan. Nagagamit kini og lainlaing pamaagi aron isabotahe sa AFP ug mga ahente sa US ang positibong naabot sa panaghisgot pangkalinaw. Dinhi sa rehiyon nagmugna og mga bangis nga lakang ang AFP aron ipasangil ngadto sa BHB, sama sa nahitabong dramang ambus sa 30th IB sa Linungganan, San Francisco, Surigaodel Norte ug pagmasaker sa 29th IB sa mga gagmay’ng minero sa San Isidro, Santiago, Agusan del Norte. Gihimo kini sa AFP aron dauton ang gideklara nga lokal hunong buto sa NDFP-NEMR tungod nahitabong linog sa Surigao del Norte. Laing bakak nga gihimo niini ang pagpasumangil gihapon ngadto sa BHB sa nahitabong panag-unay sa mga pwersa sa 30th IB sa Buodlingin, Alegria, SDN.

Pakyas ang Oplan Bayanihan sa rehimeng US-Aquino III, ug ang unang arangkada sa Oplan Kapayapaan sa rehimeng Duterte. Nakakab-ot og mga kadaugan ang BHB-NEMR sulod sa usa ka tuig, sugod sa Marso 2016 hangtud Marso 2017 nalunsad sa BHB-NEMR ang 181 ka mga aksyong militar sama sa ambus, harassment, isnayping, tsek-point ug dakop. Resulta niini adunay 97 ka patay, 84 ka samaron ug 6 ang nadakpan sa kaaway samtang 7 ang mabayanihong nakalas ug 28 ang samaron sa BHB. Nasilotan ang mga kompanya nga nagadaut sa kinaiyahan, nangilog og yuta ug nagpahimulos sa mga mamumuo sama sa SUMIFRU ug Dole-Philippines.

Malampusong gireles ang 5 ka prisoners of war (POW) nga mga pwersa sa PNP isip “goodwill” nga lakang alang panaghisgot pangkalinaw niadtong Agosto 2016. Ang pagreles gisaksihan sa liboan ka katawhan sa rehiyon gikan sa lainlaing sektor aron ipakita ang suporta alang sa panaghisgot pangkalinaw tali sa GRP ug NDFP. Taliwala sa pagkansela sa panaghisgot pangkalinaw sa rehimeng Duterte niadtong unang semana sa Pebrero 2017, hugot nga nanawagan ang katawhan sa rehiyon nga ibalik kini. Naglunsad og martsa alang sa kalinaw ang liboan ka katawhan sa mga syudad ning rehiyon aron ipakita ang pagsuporta sa pagpadayon sa panaghisgot pangkalinaw ug gikondena ang bangis nga all-out-war sa AFP niadtong ulahing semana sa Pebrero 2017. Ang POW nga si Pfc. Edwin Salan sa 30th IB andam na ireles isip lakang sa pagsuporta sa pagpadayon sa panaghisgot pangkalinaw kun motuman ang AFP/PNP nga temporaryong ihunong ang ilang mga operasyon sa mga lugar diin kini ipahigayon.

Dugang nakakonsolida ug nakapalig-on ang BHB sa iyang mga pwersa ug walay bisan usa ka pormasyon nga nabungkag sa kaaway. Nakapalig-on ug nakapalapad og bag-ong mga erya. Epektibong nakamaniobra ang mga Pulang manggugubat alang sa paglunsad sa mga kontra-atake, gimbuhatong masa, taktikal nga opensiba, produksyon, konsolidasyon ug uban pa. Padayon ang pagsalmot sa armadong pakigbisog ug pagsampa sa BHB sa ubay-ubay nga mga kabatan-onan. Nalunsad ang pagtuon sa lainlaing kursong pangpulitika ug pangpartido sa mga aktibista ug mga kadre. Gilunsad usab ang mga pulitiko-militar nga mga pagbansay alang sa pagpalambo sa disiplina, pisikal ug teknikal nga kahanas sa mga Pulang manggugubat. Padayong nahatag sa BHB ang mga katilingbanong serbisyo ngadto sa masa sama sa serbisyong medikal, pagtabang sa pagpalambo sa produksyon, pagmentina sa kahusay ug kalinaw ug uban pa.

Nadugangan ang ihap sa mga mag-uumang nakabenipisyo sa paglunsad sa minimum nga programa sa agraryong rebolusyon sama sa pagpataas sa suhulan sa panguma nga may miabot na sa P300 ang adlaw libre kaon ug isnak; duna nay nagtunhay nga libreng patubig; napaubos ang abangan sa yuta gikan sa tersyo pabor agalong yutaan ngadto sa 75-25 porsyento pabor sa saop; napaubos ang abangan sa himang panguma ug ang tantos sa pautang. Nagpadayon ang mga hungosay o bayloay sa pamuo. May kaso nga giokupahan sa mga mag-uuma ang yutang abandono aron tikaron.

Ang mga kadaugan nga atong naangkon kinahanglang dugang panalipdan ug konsolidahon aron mobunga sa labaw pang pag-abante alang sa pagtikang sa taas nga ang-ang sa gubat sa katawhan. Kab-uton pa ang pila ka pilo nga pag-asdang sa tanang natad. Pursigidong magpasampa sa BHB alang sa pagtukod sa dugang mga pormasyong platun.

Pakyason ang todong gera ug Oplan Kapayapaan sa rehimeng Duterte. Ipadayon ang mga kalihukan nga mosuporta alang sa panaghisgot pangkalinaw. Ibutyag ang mga bangis nga binuhatan sa AFP/PNP ug mga pagpanabotahe sa negosasyong pangkalinaw.

Mabuhi ang Bagong Hukbong Bayan!
Ipaasdang ang gubat sa katawhan hangtud sa kadaugan!

https://www.philippinerevolution.info/statements/20170329-labaw-pang-pakusgon-ang-gubat-sa-katawhan