Hiligaynon News: 3ID ‘online’ na

From the Philippine Information Agency (Dec 19): Hiligaynon News: 3ID ‘online’ na

Ginpresenta sang 3rd Infantry Division (3ID) sang Philippine Army nga naka-base sa Kampo Macario Peralta, Jr. sa banwa sang Jamindan ang bag-o nga website sang 3ID sa mga katapu sang media sa probinsya sang nagligad nga Disyembre 16 diri sa syudad sang Roxas.

Ginpahayag ni Maj. Ray C. Tiongson nga hepe sang Public Affairs Office (PAO) sang 3ID nga kabahin ang pagdihon sang 3ID website sa katuyuan nga labi pa gid nga mapasanyog ang pagpaabot sang impormasyon sa publiko nahanungod sa mga hilikuton, proyekto, programa kag kadalag-an sang mga soldado.

Ang 3ID nga website ang sarang malab-ot pinaagi sa www.spearheadtroopers.com.

Nahibaluan nga magluwas sa mga balita kag litrato, ang website ang nagapakita man sang mga FAQ ukon Frequently Asked Questions nahanungod sa pagsulod sa Philippine Army, mga nagkalainlain nga yunit sang 3ID, kag link sang mga mapinuslanon nga website sang mga ahensya sang gobyerno.

Sa iya nga bahin, ginpahayag ni Major General Rey Leonardo Guerrero nga commander sang 3ID nga ang bulig sang media ang daku nga kontribusyon sa implementasyon sang Internal Peace and Security Plan (IPSP) Bayanihan.

Si Guerrero ang nagpanguna sa mga opisyal sang 3ID kag mga unit commander sa ginpatigayon nga simple nga pagpakig-upod sa pila ka mga katapu sang media sa probinsya.

Samtang ginpasalamatan naman sang mga katapu sang media nga nagtambong sa pagtililipon ang inisyatibo sang 3ID kadungan sa ila paglaum sang tayuyon nga maayo nga pagtamdanay sa tunga sang mga soldado kag media sa palaabuton.

http://news.pia.gov.ph/article/view/1001418974336/hiligaynon-news-3id-online-na