CPP/NPA: Mahitungod sa pag-ambus kang Cecilio “Anggong” Abuhan

NPA propaganda statement posted to the CPP Website (Aug 22): Mahitungod sa pag-ambus kang Cecilio “Anggong” Abuhan

Alan Juanito
Spokesperson
NPA North Central Mindanao Regional Operations Command (Julito Tiro Command)

Giambus sa usa ka tim sa New People’s Army (NPA) ubos sa Regional Command sa North Central Mindanao Region si Cecilio “Anggong” Abohan sa alas kwatro sa hapon sa Agosto 21, 2014 sa Bagocboc, Opol, Misamis Oriental.

Publikong kasayuran na sa Opol ang paghupot og mga armas ug armadong mga hinanib ni Anggong. Ang maong mga armas gigamit niya sa pagpatunhay sa iyang daw-sama sa warlord nga paghari.

Dugay nang gimulo sa mga kabus nga lumulupyo sa Bagocboc ug sikbit nga kabaryuhan sa Opol ang gikaintapang mangtas nga armadong si Anggong Abuhan sa daghang mga kriminal, anti-katawhan ug kontra-rebolusyonaryong mga binuhatan nga naglakip sa mosunod:

Walay puangod nga pag-abusar sa kapin sa 10 sa iyang kitagibaryo kung asa 2 ang namatay kay gipatulon og tansan ug grabeng pagpangulata nga miresulta sa pagkabalda sa pipila

 

Pagpanunog sa kapin 20 ka mga kabalayan (tuig 2004 ug Dec 2008).

 

Pasimuno sa grupo sa mga kawatan sa kabaw ug ubang mga kahayupang panguma nga nagbiktima sa daghang mga mag-uuma

 

Aktibong paggukod sa mga gidudahang rebolusyonaryo o suporter sa NPA

 

Pagpasiugda sa illegal logging ug dili pagbayad sa mga gabasero sa kahoy

Pagpangolekta sa porsyento sa mga minahan

 

Pagpanghasi ug pagpangilog sa yuta sa mga mag-uuma ug lumad aron makasulod ug makapalapad ang plantasyon sa Palm Oil

 

Direktang kalambigitan sa kamatayon sa lider mag-uuma ug lumad nga si Gilbert Paborada ug Rolen Langala

 

Nagtapun-og na ang daghang mga reklamo ug mga kaso batok kaniya apan nagkatulog lang sa file sa kapulisan sa Opol ilabina panahon sa administrasyon ni Ex-Mayor Dexter Yasay. Sulod sa daghang katuigan, hilom nga nag-antus ang mga lumulupyo sa Bagocboc ug silingang mga baryo.

Drama lang ang pag-reyd sa CIDG sa iyang balay ug pagkumpiska kunuhay sa iyang mga armas niadtong Oktubre tuig 2013. Lahi sa ubang nadakpang naghupot sa mga armas nga gikasohan ug gipriso, yano lang nga nagpabiling gawasnon si Anggong nga nagpadayon sa iyang mga aktibidad nga daw walay tulubagon. Klaro nga dunay nag-alima kaniya nga mas labaw pa ka kriminal nga tigkunsinteng padrino.

Busa, ang demokratikong rebolusyon sa katawhan lang pinaagi sa iyang New People’s Army ang nagtapos sa iyang madaug-daugong paghari-hari nga naghatag og hustisya ngadto sa iyang mga nabiktima.

Among gipanghinaut nga niining pag-ambus kang Anggong Abuhan, walay mga sibilyan nga pasanginlan ug kasohan. Matag higayon na lang nga dunay aksyong militar nga ilunsad ang New People’s Army, abtik dayon nga molihok ang militar ug kapulisan pagpasumangil ug paggukod sa mga inosente.

Ang gidangatan ni Anggong magsilbi untang panag-ingnan sa uban pang mga lokal nga upisyal sa reaksyonaryong kagamhanan sa pag-undang na sa ilang mga kontra-rebolusyonaryo ug anti-katawhan nga binuhatan. Daku pa ang ilang kahigayunan sa pag-usab sa kaugalingon ug atimanon nila ang kinasingkasing nga pag-alagad sa katawhan.

http://www.philippinerevolution.net/statements/20140822_mahitungod-sa-pag-ambus-kang-cecilio-anggong-abuhan