CPP/NPA: Mayor sa Carmen, Agusan del Norte, Gidis-armahan sa NPA

NPA propaganda statement posted to the CPP Website (Jun 10): Mayor sa Carmen, Agusan del Norte, Gidis-armahan sa NPA

Omar Ibarra
Spokesperson
Western Agusan Norte-Agusan Sur Sub-Regional Command (Western Agusan Norte-Agusan Sur Sub-Regional Command)

Lima ka armas ang nakumpiska human gireyd sa usa ka yunit sa New People’s Army ubos sa Western Agusan Norte-Agusan Sur (NPA-WANAS) Sub Regional Command ang balay sa Municipal Mayor sa Carmen, Agusan del Norte niadtong Hunyo 8, 2014 sa gabii.

Nagpakana nga mga sundalo ang mga naka-uniporme nga Pulang manggugubat ug dali ra sila nga nakasulod sa balay ni Mayor Monching Calo. Nadis-armahan dayon ang gwardya niini ayha nasulod ang balay. Nakumpiska sa maong pagreyd ang usa ka Baby M16 Automatic Rifle, duha ka shotgun, usa ka 9mm pistol, usa ka Ingram, mga buhing bala ug mga magazine, usa ka laptop computer ug duha ka camera. Nahitabo ang maong pagreyd samtang atua sa kauluhan ang Mayor. Paspas ug luwas nga nakawithdraw ang mga kauban human sa panghitabo.

Lunod-patay nga kontra-rebolusyonaryo si Mayor Calo. Nagsalig kini dili lang sa kaugalingong mga armas ug mga gwardya, kundili sa mga pwersa sa kapulisan ug reaksyonaryong kasundaluhan usab. Ginareklamo sa katawhan ang maong mayor sa militaristang paghari niini sa ilang lungsod.

Sa laing bahin, duha ka harassment ang napahigayon sa NPA batok sa paramilitar nga grupong Bungkatol Liberation Front (BULIF) didto sa Sitio Reserba, Brgy. Tungao, Butuan City.

Unang giharas sa usa ka tim sa NPA ang maong grupo niadtong Hunyo 2, 2014, sa bandang alas 10:00 sa gabii. Mikabat og pila ka minuto ang sinukliay og bala ayha luwas nga nakawithdraw ang mga Pulang manggugubat. Ginasuta pa ang kaswalidad sa BULIF.

Sa maong lugar gihapon natigayon ang ikaduhang pagharas batok sa BULIF pagkaugma, Hunyo 3, mga bandang alas 7:00 sa gabii. Wala na nakabalos pa ang mga kaaway.

Human sa duha ka harassment, nagpahigayon dayon og operasyong militar sa maong lugar ang kapin 100 ka tropa sa Special Forces ug Scout Rangers. Tataw ang pagpaluyo sa kasundaluhan sa grupong BULIF nga gipanguluhan sa kontra rebolusyonaryong si Datu Eddie Ampiawan alyas Bawang. Nahimo nang dangan sa katawhan ang maong grupo diin pinakaulahing gipatay nila mao si Datu Rolando Ambungan kaniadtong Enero 31.

Dili moundang ang rebolusyonaryong kalihukan, pinaagi sa New People’s Army ug sa mga lokal nga Milisyang Bayan niini hangtud nga dili masumpo ang kabangis sa mga militaristang pulitiko sama ni Mayor Monching Calo, sa mga grupong paramilitar sama sa BULIF, ug sa armadong kusog sa pipila ka nagharing hut-ong nga mao ang AFP ug PNP. Pinaagi lang sa pagbungkag niining bangis nga mga makinarya nga malingkawas ang katawhan gikan sa pagpangdaugdaug ug pagpahimulos sa pipila.

http://www.philippinerevolution.net/statements/20140610_mayor-sa-carmen-agusan-del-norte-gidis-armahan-sa-npa