CPP/NPA-Negros: 303rd Brigade Commander Col. Alberto Desoyo naga-istorya sang kaugalingon niya nga landing

NPA-Negros propaganda statement posted to the Communist Party of the Philippines Website (Jul 23): 303rd Brigade Commander Col. Alberto Desoyo naga-istorya sang kaugalingon niya nga landing

Juanito Magbanua, Spokesperson
NPA-Negros Island (Apolinario Gatmaitan Command)

23 July 2018

Nalipat si Col. Alberto Desoyo sa kasaysayan sang paghimakas sang pumuluyo para maangkon ang matuod-tuod nga hustisya sosyal para sa matuod nga reporma sa duta kag pungsudnon nga industriyalisasyon. Ang pag-angkon sang kalinong amo ang pagsolbar sang kawsa sang armadong rebolusyon sang sahing pigos.

Si Col. Desoyo naga-istorya sa kaugalingon niya nga landong nga kung wala sang insurhensya, ang pundo sang gobyerno magakadto sa pumuluyo. Nagapakita lang nga ang iya panindugan hamulag sa matuod-tuod nga kahimtangan tungod ini tanan lunsay mga patalang upod sa iya maitom nga propaganda kag psywar batok sa New People’s Army (NPA) kag pumuluyo. Ang kawad-on sa duta sang mangunguma, kapigaduhon, inhustiya kag korapsyon pila lang ka rason nga amo ang nagbun-ag sang armadong rebolusyon sang pumuluyo batok sa pasistang makinarya sang reaksyunaryo nga estado nga gina representahan ni Duterte.

Ang matuod ang daku nga bahin sa pundo sang gobyerno nagakadto sa AFP/PNP samtang ang mga mamumugon sa kampo sa isla sa Negros nagaantus sang barato nga sweldo kag mumho nga benipisyo halin sa gobyerno. Nagahabok ang bulsa sa kurapsyon sang mga opisyal sang Philippine Army sa pagkuha sang pundo halin sa programa sang Comprehensive Local Integraion Program (CLIP) pinaagi sa peke nga pagpasurender sa mga masa kag pasibangdan nga NPA, paghimu sang mga scripted nga enkwentro para sa kapritso kag pagprensentar sang mga peke nga nadakpan nga NPA agud mabulsa ang reward money. Nangin dugang man nga bubon sa kurapsyon ang recycled nga eskema sang AFP-PNP-DILG sa ginduso nga localized peace talks sa katuyuan nga tungaon kag pasurenderon ang NPA.

Naghuromentado ang 94th IB sa kaangay nila nga pasistang tropa, sa pagdali nga makakuha sang accomplishment report para ipahambog sa ila commander-in-chief US-Duterte. Ang matuod wala sang enkwentro nga natabu sa Isabela tunga sang 94th IB kag sa yunit sang Leonardo Panaligan Command kundi ang matuod misencounter ang natabu sa hanay mismo sang 94th IB. Bangud sa hugot nga suporta sang malapad nga masa ang AFP pareho lang nagapangita sang dagum sa tunga sang kalasangan nga bisan ano pa nga himuon nila nga kampanya militar indi gid nila mawasak ang rebolusyonaryo nga pwersa.

Sa kapalpakan ni Col. Desoyo nga lutuson ang NPA amo man ang kabaris sang 303rd Brigade nga paukpan ang mga pumuluyo sa paghimu sang bayolasyon sa tawhanong kinamatarung sa pagpatarasak nga pagpinalupok bisan wala sang NPA, pagpapatay sa mga lider masa, trumped-up charges, pagsabwag sang intriga nga may upod nga itom nga propaganda kag mga pag-akupar sang komunidad sang mga tumandok, eskwelahan, kapilya kag ang pagwasak sa pangabuhian sang pumuluyo sa kaumhan.

Nagahiliusa ang malapad nga patriyotiko kag demokratiko nga pwersa para pabagsakon ang ini nga pasistang rehimen ni Duterte. Sa iya nga ikatatlo nga SONA karon nga July 23, 2018 nagapabilin ang neo-liberal polisiya sa ekonomiya, pagsaka sang presyo sang tanan nga balaklon tungod sa Tax Reform For Acceleration & Inclusion (TRAIN) Law. Ang pagpataw sang Martial Law sa Mindanao ginpasangkad sa bilog Pilipinas pareho sa Oplan Istambay, Oplan Tokhang kag iban pa nga pagpang-ipit sa mga oposisyon kag kritiko sang US-Duerte nga administrasyon. Sa ikatlo nga SONA ni Duterte gina-ekspektar nga mangin puro na lang ini buladas kag cinematographic effects agud tabunan ang nagakaagnas nga US-Duterte rehimen.

https://www.philippinerevolution.info/statements/20180723-303rd-brigade-commander-col-alberto-desoyo-naga-istorya-sang-kaugalingon-niya-nga-landong