NDF/NPA-Central Negros: Ginatanyag nga “Peacetalk” ni Duterte sa CPP-NPA-NDF Lunsay Pasalig kag Pagpanginto

NPA-Central Negros Guerrilla Front propaganda statement posted to the National Democratic Front Website (Jun 22): Ginatanyag nga “Peacetalk” ni Duterte sa CPP-NPA-NDF Lunsay Pasalig kag Pagpanginto

Press release | Hunyo 22, 2018
Ka JB Regalado
Spokesperson, Leonardo Panaligan Command
New People’s Army, Central Negros Guerrilla Front

Ginadayaw sang LPC-NPA ang KAUGMAON-KMP kag bug-os nga pumuluyo sa Central Negros sa ila ginhimo nga serye sang Peace Caravan, diin gintambungan sang masobra 3,000 ka pumuluyo sadtong Mayo 10, 2018 kag Hunyo 12, 2018 nga ginkulminar sa Guihulngan, Negros Oriental. Maisog sila nga nagapanawagan sang gilayon nga pagpauntat sang extra-judicial killings kag human right’s violations nga direkta ginkomiter sang state security forces partikular na sang AFP kag PNP sa ila kampanya kontra-druga, kontra-terorismo kag kontra-insurhensiya idalum sa kampanyang militar Oplan Kapayapaan sang US-Duterte nga rehimen.

Ginasinggitan man nila ang pagpa-untat sang militarisasyon sa mga kaumahan sa Central Negros kag bug-os nga isla. Ginatib-ong man nila ang pagpatuman sang CARHRIHL kag pagpadayon sang Peacetalks sa tunga sang NDFP kag GRP agud gilayon nga mahambalan sang magkatimbang nga bahin ang Comprehensive Agreements on Socio and Economic Reforms.

Kadungan sa ila ginapanawagan ang gilayon man nga pagpauntat sang TRAIN law diin naghatag sang perwisyo sa naga-antus na nga daan nga pumuluyong Pilipino sa kapigaduhon, kawad-on sang duta kag palangabuhian. Suno man sa ila, ginahangkat nila ang rehimeng US-Duterte kag ang AFP sa sinsero sini nga paghilway sang mga political prisoners labi na ang mga NDFP Consultants sa madinalag-on nga paghambalanay sang kalinong sa pungsod kag maugat ang kawsa sang gyera sibil.

Dalayawon ini nga lihok sang mga mangunguma kag pumuluyo nga nakahangup kag nagatib-ong sang demokratikong interes sang malapad nga pumuluyong Pilipino ilabe na ang pagpatuman sang matuod nga reporma sa duta kag pungsodnon nga industrialisasyon.

Samtang ginakondenar man sang NPA ang ginhimo nga “Peace Rally” sang AFP labi na sang 62nd IBPA sa Mabinay, Negros Oriental sadtong Hunyo 12, 2018. Desperado nga gingamit sang militar ang ika-120 ka tuig nga pagsukat sang “adlaw sang paltik nga kahilwayan” sa pagtursi kag pagbaliskad sang kamatuoran batok sa CPP/NPA/NDF. Ang pagdramatisa sang ila “psywar” kag “black-propaganda” kontra sa NPA, isa ka “sarswela sang ila mga kabutigan.” Tanda ini sang ila muklat nga pagsabotahe sa pagpadayon sa Peacetalks sa tunga sang NDFP kag GRP.

Ang liwat kag temporaryo nga pagkansela ni Duterte sa naka-skedyul na nga Peacetalks, isa ka duso-butong nga desisyon kag mga palayag. Indi siya sinsero sa pagsolbar sang ugat kag kawsa sang gyera sibil sa pungsod. Upod sa AFP gusto sini nga ipatuman ang kampanya tudo gyera batok sa CPP-NPA-NDF. Ang kamatuoran, madugay na nga nagahandum sang tunay, makatarunganon kag malawigon nga kalinong ang pumuluyong Pilipino. Gani indi rason nga nagakinahanglan pa nga konsultahon ang “stakeholders” bangud bisan sin-o man, nagaduso nga ipadayon ang Peacetalks luwas lang ni Lorenzana sang DND kag pila pa sa mga spoiled brats sang US-CIA sa pungsod. Ang matuod lunsay pasalig, panginto kag “lipserving” na lang ang ginatanyag nga Peacetalks ni Duterte kag sang AFP sa CPP-NPA-NDF.

Wala sang asahan pa ang malapad nga pumuluyo sa US-Duterte nga rehimen kundi ang maisog kag matutom nga paghimakas. Suportahon ang armadong rebolusyon nga ginasulong sang CPP-NPA para sa tunay kag makatarunganon nga kalinong sa pungsod.

https://www.ndfp.org/ginatanyag-nga-peacetalk-ni-duterte-sa-cpp-npa-ndf-lunsay-pasalig-kag-pagpanginto/