4 BIFF patay sa bakbakan

From Philippine Star Ngayon (Jan 2): 4 BIFF patay sa bakbakan (4 BIFF killed in clash)

Apat na miyembro ng Bangsamoro Islamic Freedom Fighters (BIFF) ang napatay makaraang muling sumiklab ang matinding sagupaan ng militar na nag-umpisa bandang alas-7:40 ng gabi hanggang alas-5:20 ngayong umaga sa Maguindanao.

Ayon kay 1st Mechanized (light armor) Brigade Commander Colonel Felicisimo Budiongan, sunud-sunod na sinalakay ng BIFF ang mga detachment sa bayan ng Datu Salibo, Maguindanao.

Dahil sa rami ng mga re­belde ay nagpakawala ng mga bala ng 105mm Howitzers cannon ang military at tumulong na rin ang dalawang MG-520 attack helicopters ng Philippine Air Force (PAF) para bombahin ang BIFF.

Maraming sibilyan din ang nagsilikas sa takot na maipit sa kaguluhan patu­ngo sa mga ligtas na lugar sa bayan ng Datu Piang at Datu Saudi Ampatuan.

Nabatid na ang sunud-sunod na pagsalakay ng BIFF ay ganti ng mga rebelde sa pagkasawi ni Tamarin Esmael alyas Kumander Tamarin, vice chairman ng Internal Affairs ng Bangsa­moro Islamic Freedom Movement (BIFM).

Maliban sa pag-atake sa bayan ng Datu Salibo, inatake rin ng BIFF ang mga detachment ng sundalo sa mga bayan ng Pigcawayan at Midsayap sa North Cotabato.

Gayunman, may mga inisyal na ulat na nasa apat na BIFF ang napatay at marami ang sugatan sa magkabilang panig dahil sa nagpapatuloy na panaka-nakang sagupaan.

http://www.philstar.com/probinsiya/2017/01/02/1658790/4-biff-patay-sa-bakbakan