Hiligaynon News: Mga anay rebelde pagahatagan sang duta

From the Philippine Information Agency (Aug 8): Hiligaynon News: Mga anay rebelde pagahatagan sang duta (Former rebels will be given land)

SYUDAD SANG ROXAS, Capiz – Ginpasalig ni Pangulong Rodrigo Duterte ang anay mga rebelde nga hatagan sila sang duta.

Ini matapos nga nagtambong ang kapin sa 17 ka mga katapo sang New People’s Army nga nagbalik sa sabak sang gobyerno sa pagbisita sang Presidente sa kampo sang 3rd Infantry Division sa Jamindan, Capiz.

Ang nasambit nga mga anay rebelde ang gikan sa banwa sang Tapaz.

Ginpasalig ni Pangulong Duterte sa mga ini nga pagahatagan sila sang duta nga mangin ila kag sarang nila mapangumhan.

Ini bilang sabat sa pamangkot kon paano sila mabuligan sang Presidente sa ila pagsugod sa bag-o nga kabuhi.

Maluwas sa duha, hatagan man sila sang semilya para inogtanom diri, lakip na ang pagpaandam sang Pangulo nga indi pag-ibaligya ang duta nga igahatag sang gobyerno.

Gin-apilar man ni Pangulong Duterte sa mga ini ang kabudlay sa pagpasakop sa grupo nga nagakontra sa gobyerno bangud wala sang grupo nga nagakontra sa gobyerno ang nagadaog.

Ginpapahundom man sa mga ini nga dapat malooy sila sa mga kabataan nga amo ang masami nga naapektuhan sa pagpasakop nila sa amo nga grupo.

Ginhingyo man niya ang mga ini sa pagbulig agud mangin malinong kag matawhay sa Pilipinas.

http://news.pia.gov.ph/article/view/991470637463/hiligaynon-news-mga-anay-rebelde-pagahatagan-sang-duta