CPP/NDF-Mindanao: Gikondena sa NDFP-Mindanao ang grabeng malisud nga kahimtang sa nasud

NDF-Mindanao propaganda statement posted to the CPP Website (Jul 25): Gikondena sa NDFP-Mindanao ang grabeng malisud nga kahimtang sa nasud

NDFP National Democratic Front of the Philippines

 

Press Statement
25 July 2015

 

Karong Hulyo 27, si Benigno Simeon Aquino III mohatag sa iyang State of the Nation Address kun SONA aron pagsumada ug pagpasigarbo sa nakab-ot sa iyang administrasyon sa miaging 5 ka tuig, ug isalindot ang iyang mga krimen sa katawhang Pilipino. Ang mga nagharing hut-ong ug ilang amo nga imperyalista mamalakpak, apan ang kinabag-ang katawhang Pilipino nga nag-antus sa kalisud, magprotesta.

 

Sa 5 ka tuig, nag-unang duso sa rehimeng US-Aquino ang pagkumpleto sa “neo-liberalisasyon” nga subay sa dikta sa imperyalistang US. Nagkahulogan kini sa pagtangtang sa babag, apil mga balaud ug palisiya nga nanalipod sa atong patrimonya ug soberenya, alang sa paturagas nga pagkawkaw sa nasudnong rekurso, ug dugang pagpahimulos sa mabagang katawhan sa mga imperyalista ug lokal nga nagharing hut-ong. Nagkahulogan usab kini sa mas bangis nga pagpamitol sa Oplan Bayanihan, aron dugmokon ang armado ug dayag nga pakigbisog sa katawhan alang sa nasudnong kalingkawasan ug demokrasya.

 

Ipasiatab ni Aquino III ang 6.3% average nga pagtubo sa Gross National Product o GDP sa 5 ka tuig, nga nag-unang nakabase sa tataw nga pagsaka sa sektor sa serbisyo. Apan, tin-aw usab nga mikunhod ang produksyon sa agrikultura ug manupakturya gikan sa 60% nga kabahinan sa GDP niadtong 1980s, sa wala pa ang palisiya sa globalisasyon, ngadto sa 40% sa miaging 5 ka tuig. Resulta, mas mibaha ang mga imported nga igbabaligya sa merkado ug mibagsak ang atong lokal nga produksyon. Busa, nasinati nato karon ang pinakagrabeng krisis sa trabaho sa kasaysayan, kun diin ang walay trabaho ug parsyal nga dunay trabaho mikabat sa 11.8 ka milyon o 27% sa tibuok kusog pamuo sa nasud. Ang kapobrehon nagpabilin sa 25%-26%, kun diin 56 ka milyon o kapin sa katunga sa Pilipino ang nagpuyo ubos sa Php 100.00 nga income sa pamilya matag tuig.

 

Ang neo-liberal nga palisiya nga gipatuman ni Aquino III, nagsaad sa “inclusive” o tanang bahin nga pagtubo, apan sa tinuoray usa ka bahin o “exclusive” lang sa nagharing hut-ong ug imperyalista ang pagtubo, ug misamot ang kawad-on sa mga naghagong katawhan. Wala mabati sa mabagang katawhan ang pagtubo sa ekonomiya kay ang mga dagkung agalong yutaan, dagkung burgesyang kumprador ug imperyalista ang subrang nadatu samtang ang mga kabus misamot kakabus. Grabeng giguba usab ang kinaiyahan kay ang palisiya sa liberalisasyon mitugot sa mga higanteng minahan, plantasyon ug logging sa paturagas nga pag-opereyt aron lang gyud makakumkom sa subrang ginansya.

 

Gipatuman ni Aquino III ang “walang wang-wang” batok sa pribilihiyo sa trapik sa mga opisyales aron pagsulbad sa suliran sa trapik sa Metro Manila, apan karon maut gihapon ang trapik sa kaulohan. Ang iyang palisiya sa pribatisasyon sa transportasyon nga gilimin sa korapsyon wala makasulbad sa suliran sa trapik ug transportasyon. Ang kontra-korapsyon nga “daang matuwid” ni Aquino III migamit sa PDAF “pork barel” aron ipabilanggo ang mga lider oposisyon, apan nag-imbento kini sa DAP aron modaku pa ang tinubdan sa korapsyon alang sa tibuok burukrasya, bisan pa man kung nagdesisyon na ang Korte Suprema nga nahasupak kini sa konstitusyon. Gani usa sa igsoong babaye sa presidente ang nalambigit sa anomaliya tali sa usa ka Czech nga negosyo. Ang korapsyon lalom usab nga nakagamot sa AFP-PNP ug ubang linya sa burukrasya sama sa Bureau of Customs, DENR, DPWH, ug uban pa, ug nagsamot kini.

 

Sa krisis sa West Philppine Sea, nagapakaarong-ignon si Aquino III nga nagabarug batok paglapas sa China sa atong teritoryo. Apan, tin-aw usab nga nagpaggamit kini sa imperyalistang US sa panagbangi sa US tali sa China kalabot sa pangmilitar nga dominasyon sa rehiyon ug sa $5 ka trilyon dolyares nga ruta sa negosyo sa South China Sea. Ang katawhang kinahanglang maghiusa aron depensahan ang atong soberanya batok sa paglapas sa China, ug batokan ang paggamit kanato sa US sa iyang paghari sa rehiyon sa Southeast Asia.

 

Ang panultihon ni Aqino III nga “kayo ang boss ko” sa tinuoray, mas mipalig-on sa monopolyo sa gahum sa dagkung agalong yutaan, dagkung burgesyang kumprador ug imperyalistang US. Mas migrabe karon ang dinastiya sa mga pamilyang pulitiko gikan sa ang-ang lungsod pataas. Ang giingong elektoral nga sistemang partido way pulos kay nagbalhin-balhin lang og partido ang mga “balimbing” subay sa kung kinsa ang naa sa gahum.

 

Ang tinuod nga demokrasya nga gipasikad sa demanda sa katawhan alang sa tinuod nga katilingbanong kalingkawasan ginasumpo pinaagi sa kontra-rebolusyonaryong Oplan Bayanihan (OPB) sa tibuok nasud nga nagpokus sa Mindanao, apan gitagoan ang maong kabangis gikan sa mata sa publiko. Ang rehimeng US-Aquino mideploy kapin 60% sa kinatibuk-ang pwersa sa AFP ngadto sa Mindanao ug pinaagi sa kasabutang EDCA tali niini ug sa imperyalistang US, libre na ang mga sundalong kano paggamit sa bisan unsang pasilidad sa AFP sa bisan asang lugar, ug libre kining maniktik ug mosalmot sa tago ug dayag nga mga operasyong militar sama sa nahitabo sa Mamasapano.

 

Sa Mindanao, ang OPB maoy nag-unang kampanya sa pagpanumpo kun diin dinaghang nagalapas kini sa tawhanong katungod sa ngalan sa interes sa imperyalista ug lokal nga nagharing hut-ong, ug sa iyang pagdamgo nga gub-on ang rebolusyonaryong kalihokan. Hapit na matapos ang iyang termino, apan halayo ang posibilidad nga mapukan niini ang rebolusyon. Ug walay ikabilin kini nga ligasiya sa katawhan, gawas sa kabangis, dugang kapobrehon ug pagguba sa kinaiyahan.

 

Daghang lugar sa Mindanao ang gimilitarisa pinaagi sa sustinidong kombat nga mga operasyon, pag-okupar sa mga baranggay sa COPD ug CAFGU detatsment, harassment ug pugos nga pagtak-op sa pipila ka mga eskwelahan sa komunidad, pagpatay sa ubay-ubay nga mga masang lider ug gikatahapang rebolusyonaryo, panganyon ug pangbomba, ug ubang porma sa terorismo batok sa katawhan. Ang AFP naglunsad usab og COPD sa ubay-ubay nga eskwelahan ug komunidad sa kasyudaran. Aron masumpo ang nagkakusog nga dayag nga pagsukol sa katawhan, daghan ang gikasohan ug gipapriso nga mga masang lider aron punggotan sa liderato ang mga progresibong organisasyon.

 

Nag-awhag sa kalinaw ang reheming Aquino, apan ang paningkamot niini partikular sa Bangsamoro, misangpot sa dugang pagkabahin-bahin sa katawhang Moro. Inay negosasyon mas gigusto sa rehimen ang pagsurender sa mga Moro nga nakigbisog alang sa tinuod nga katungod sa kaugalingong paghukom. Sa pikas bahin, napakyas kini sa pagtuman sa pinirmahang kasabutan tali sa NDFP, sama sa The Hague Joint Agreement ug Joint Agreement on Safety and Immunity Guarantees (JASIG); gani, padayong gipriso niini ang mga NDFP konsultant apan gibasul ang NDFP nga subrang nagademanda ug dili matinud-anon.

 

Bisan pa sa superyoridad sa armadong kusog sa reaksyonaryong estado, ang katawhan misukol sa tumang kusog ug kamapangahason. Inay palungon, gidagkutan na hinoon sa rehimen pag-usab ang armadong pagsukol sa Bangsamoro, ug pakyas kini sa pagsumpo sa rebolusyon nga gipangulohan sa CPP-NPA-NDF. Ang natarang gerilya sa BHB midaghan gikan sa 42 ngadto sa 47, ug mitubo ang ihap sa mga Pulang manggugubat ug baseng masa, samtang midaku ug mikusog ang Partido.

 

Sulod sa 5 ka tuig sa rehimeng US-Aquino ang armadong pakigbisog sa Mindanao mas mikusog. Mas mapangahason ug mas sobsob ang mga taktikal nga opensiba sa BHB, nga nakakumpiska sa dul-an usa ka libo nga high-powered rifles ug nakapuo og usa ka batalyon nga kaaway kapin kun kulang matag tuig. Ang agraryong rebolusyon sa kabukiran mibenipisyo sa gatusan ka libong mag-uuma sa tibuok nasud sukwahi sa kontra katawhan ug peke nga repormang agraryo sa rehimeng US-Aquino. Ang dayag nga kalihokang masa mikusog, kun diin libo-libong katawhan ang miprotesta batok sa militarisasyon, pangawkaw ug pagguba sa kinaiyanhong rekurso ug interbensyon sa US.

 

Halos tulo na lang ka bulan sa pag-file sa mga kandidato sa eleksyon, apan wala pa makapili si Aquino III sa iyang kandidato nga dunay dakung kahigayonan nga modaug ug manalipod aron dili siya mapriso sa iyang mga krimen kung wala na siya sa gahum. Bisan unsa pa man ang resulta sa eleksyon, kinahanglang singlon sa katawhan si Benigno Simeon Aquino III sa iyang mga krimen batok sa katawhan.

 

(sgd.) Ka Oris
Spokesperson
NDFP-Mindanao

 

http://www.philippinerevolution.net/statements/20150825_gikondena-sa-ndfp-mindanao-ang-grabeng-malisud-nga-kahimtang-sa-nasud