NDF-Bohol propaganda statement posted to the Communist Party of the Philippines (CPP) Website:
Armadong pakigbisog sa Bohol, magpadayon hangtud dili masulbad ang gamut-hinungdan sa kalisud
Jose Ignacio, Liaison Officer
NDFP Bohol
18 May 2018
Ang nahitabong panagsangka tali sa New People’s Army (NPA) ug mga sakop sa 47th Infantry Batallion sa Armed Forces of the Philippines (AFP) sa Sitio Ilawod, Brgy. Campagao, Bilar, Bohol niadtong sayong kabuntagon sa miaging Mayo 15, usa ka dili gayud malikayan nga panghitabo sulod sa usa ka nasud nga adunay nagpadayong civil war diin nagtunhay ang duha ka gobyerno – ang usa niini naglunsad og makatarunganong gubat sa katawhan pinaagi sa nasudnon demokratikong rebolusyon, batok sa nagtunhay’ng dunot ug reaksyunaryong pangagamhanan.
Desperado ang AFP ug pangagamhanan sa probinsya sa Bohol nga tabunan kini nga kamatuoran busa gigamit nila ang tanang porma sa pagpamakak ug pagpanglingla. Sa pagpamakak, ilang gipala-um ang katawhan nga ang mga gihimong ginagmay’ng reporma sa gobyerno nga sa pagkatinuod pagpaka-aron ingnon lang, mao na ang makasulbad sa kalisod sa mga Bol-anon.
Ilang gipasi-atab nga malinawon kun “peaceful” ang Bohol, limod sa kamatuoran nga ang presensya sa militar ug grabe ka militarisado nga kabukiran sulod na sa hapit duha ka dekada, nagpamatuod nga anaa ang gamut-suliran nga nagsugnod kanunay sa pakig-rebolusyon. Ang pagyaka sa 302nd Infantry Brigade hangtud karon ug pagsulod-guwa sa lain-laing mga tropa sa militar nga walay laing gibuhat kun dili ang pagtisok og kahadlok sa mga mag-uuma ug mananagat, pagsulay sa pagsiak- siak sa mga organisasyon nga nag-inisyatiba aron mulambo ug muhimo og lakang sulbad sa kakabus, ug pagpahunong kanila aron muhilom taliwa sa naghitak nga korapsyon, anti-katawhan nga mga polisiya ug pagpangabuso sa mga anaa sa pangagamhanan – mao kini ang gipanghambog nga “kalinaw” nga nanukad sa kahadlok ug paghikaw sa katungod ug kagawasan sa mga mag-uuma, mamumuo, trabahante, ug uban pang kabus nga Bol-anon.
Ang Oplan Kapayapaan nga gipatuman sa pangagamhanan ni Chatto pinaagi sa CDP-PPM, usa ka baliktad nga kalinaw tungod kay kini ang nagpagrabe sa malangkubong militarisasyon sa kabukiran ug kadagatan aron himuong legal ang pagpangyatak sa tawhanong katungod ug pagpakuyanap og mga intriga ngadto sa mga lehitimong organisasyon sa mga mag-uuma, mananagat ug kababayen-an aron siak-siakon ang katawhan sa baryo. Apan pakyas sila sa pagbungkag sa panaghiusa’ng napundar sa mga tawo.
Ang CDP-PPM ni Chatto, nagpa-away-away sa mga lumulupyo pinaagi sa mga intriga ug pagpanghambog ug pagpanghaylo pinaagi sa pudyot nga mga serbisyo kunohay aron buta-an ang mga Bol-anon sa mas lawom pa nga kamatuoran nga ang gobyernong Chatto nagpaka-itoy lang sa mga dagkong kapitalista nga migunit sa kontrol sa ka-mahal sa isda, bugas ug gasolina sa Bohol. Hino-noa, nga gipasumanginlan pa ang mga mag-uuma nga mao kunoy nagtapol sa pagpananom, mga mananagat nga mao kunoy nagdawo sa pagbaligya sa ilang mga isda, mga tricycle drivers ug motorista nga mao kunoy walay disiplina, mga ideya nga gipasi-atab sa radio commercials nga nagduot sa batakang masa nga sila ang hinungdan sa ilang kalisod.
Baliktad usab ang giingon ni Col. Madriaga nga mibiya na ang masa sa Bohol sa armadong pakigbisog. Sama siya sa nagdamgo sa udtong tutok o nagpa-buta-buta lang sa kamatuoran. Sa pagka-tinuod nag-umido ang kasuko sa masang mag-uuma nga hangtud karon, pila na ka eleksyon ang nilabay, wala pa gihapoy kaseguroan sa ilang yutang gitikad ilabi na niadtong nawad-an og baol tungod sa pugos nga pagpananom og kahoy sa probinsyal nga kagamhanan aron kapuy-an sa mamag (tarsier). Nasuko ang mga mamumuo sa umahan sa kaubos sa suholan, habal habal drivers ug mga motorista nga nagping-it sa kataas sa presyo sa gasolina ug mao ray madaog-daog og dakop sa mga awtoridad, mga gagmay’ng mananagat nga naapektohan sa R.A. 10654 nga mao ra say mahiagom sa pagpanakop, ug uban pang kabus nga nahiagom sa ka-walay pagtagad sa gobyerno, grabeng krisis ug militarisasyon. Ang istatistiko nga ilang gipanghambog numero lang nga mahimong doktoran, apan ang gutom nga tiyan ug buslot nga bulsa sa katawhan, dili gyud malimdan.
Taliwa niini, daghang mga Bol-anon ang nanawagan nga muadto ang NPA sa ilang dapit. Daghan usab kanila nga mitanyag sa ilang pinaka-maayong anak nga musampa sa NPA. Sa laktud, ang pagpang-lingla ug pagtabon sa gobyernong Chatto sa tinuod nga kahimtang ug pagpanghambog niini pinaagi sa CDP-PPM duyog sa pagpanupil sa militar sa mga lehitimong organisasyon, maoy nakapa- mata sa katawhan, ug ang ilang binuhatan mismo maoy numero unong “rekruter” sa mga NPA sa Bohol.
Kun magpadayon ang CDP-PPM ni Chatto ug ang militarisasyon sa kabanikanhan taliwa sa kakabus ug kalisud, mosulbong ang pagdako sa mga yunit sa NPA sa Bohol ug makatampo sa pagpadali sa kadaugan sa rebolusyon sa tibuok nasud. Busa seguradong mapakyas ang militar ug ang lokal nga gobyernong Chatto sa ilang gihimong pagpanumpo sa rebolusyonaryong kalihukan dinhi sa isla.
Ang rebolusyonaryong gobyerno sa katawhan nga nakabase sa kabukiran nga girepresentahan sa NDFP, naninguha alang sa tinuod nga kausaban sa nasud ug dili bulag ang Bohol niini. Kausaban ang gitinguha sa lapad nga katawhang Pilipino nga giulipon sa nagtunhayng gobyerno sa nagkumboyang dagkong komprador kapitalista ug agalong yutaan nga gipaluyohan sa Imperyalistang US.
Samtang anaa pa ang pagkontrol sa Imperyalistang US sa ekonomiya, pulitika ug kultura sa atong nasud ginamit ang papet nga gobyerno nga karon gipangulohan ni Duterte uban sa AFP, dili usab mahunong ang pagtumaw sa armadong pakigbisog ug uban pang porma sa pakigbisog nga gilunsad sa katawhan labina sa mga mag-uuma ug mamumuo nga maoy grabeng apektado sa kalisod.
Kinahanglang pulihan na sa usa ka bag-ong sistema ang korap ug dunot nga sistemang alang-alang kolonyal ug alang-alang pyudal sa Pilipinas nga padayong gitay-og sa krisis. Pulihan kini sa sistemang sosyalista diin ang katawhang Pilipino na ang makatagamtam sa bahandi sa nasud ug dili ang pipila ka adunahan ug langyaw’ng kapitalista lamang lakip na ang China nga karon buot sab makig-ilog sa US sa pagpahimulos sa ka-abunda sa nasud ilabi na sa atong teritoryo sa West Philippine Sea. Kini ang kaugmaon kun magmadaugon ang nasudnon demokratikong rebolusyon sa katawhan.
Ang NPA ug NDF sa Bohol, pinangulohan sa Communist Party of the Philippines (CPP) nag-awhag sa katawhan nga magmatuki-on kanunay sa atong kahimtang aron dili malingla sa mga pasalig sa mga anaa sa dunot nga panggobyerno. Sa pikas bahin musalig kita sa atong kaugalingong kusog, sa panaghiusa sa masa aron isulong ang nasudnong demokratikong rebolusyon hangtud sa kadaugan isip bugtong kasulbaran. Ang masang katawhan mao ang tinuod nga bayani. Ang masang katawhan lamang ang tigmugna sa kasaysayan ug dili ang mga mapahimuslanon.
