Cebuano News: Opisyal sa NPA intelligence unit sa Mindanao, nasikop sa Bohol

From the Philippine Information Agency (Sep 19, 2020): Cebuano News: Opisyal sa NPA intelligence unit sa Mindanao, nasikop sa Bohol (By Rey Anthony H. Chiu)

TAGBILARAN CITY, Bohol, Sept. 18 (PIA) -- Dili na gyud luwas alang sa mga sakop sa New People’s Army (NPA), ang armadong kusog sa Communist Party of the Philippines (NPA) nga dinhi magpabugnaw sa Bohol.

Kini maoy leksyon nga nakuha ni Junifie Dagale, nga giila usab sa alias nga Chang, Tanya, Habagat ug Inang, 43 anyos kinsa nasikop sa hiniusa nga operasyon sa Philippine National Police (PNP) ug sa Armed Forces of the Philippines (AFP) Septembre 17, 2020, taho pa ni 47IB Civil Military Operations Officer First lieutenant Elma Grace Remonde-Abulencia.

Matud sa mga militar, si Dagale, gituohan nga usa ka taas nga opisyal sa NPA nga tua mag operate sa Southern Mindanao Regional Committee isip sakop sa Intelligence Unit sa Regional Operational Command.

Si Dagale nasikop sa mga tinugyanan samtang nagpabugnaw dinhi sa Bohol ug didto temporaryo nga mipuyo sa balay sa paryente sa iyang bana didto sa isla sa Aguining, sa isla nga lungsod sa President Carlos P. Garcia.

Si Dagale nalusotan og arrest warrant sa kaso nga pagpatay nga gipagawas ni Judge Virginia Tejano-Ang sa Branch 1, Regional Trial Court 11 sa Tagum City, Davao del Norte.

Naabtan sa hiniusang bahan sa kapolisan ug kasundalohan si Dagale sa balay nga gisak-an mga alas 8:30 dihang gitunol sa kapolisan ang warrant, matud pa sa 47IB.

Nagsugod sa pagka-aktibista hangtud nga nahimong aktibo nga lider sa Guerilla Front 33 nga nag-bahasbahas sa Davao Region, si Dagale naduhig sa daghanang mga buhat pang terorismo sama sa pag-sulong sa mga kampo, pagpangdaub sa mga kabtangan ug kabalayan, pagpangsakmit sa mga tawo aron lukaton, ug pagpang-ambush gamit ang Improvised Explosive Device (IED) nga nakapatay nag daghang sibilyan ug sakop sa kagamhanan, butyag sa mga militar.

Sa iyang pwesto isip sakop sa Intelligence Unit, sa iya nagagikan ang kasayuran sa malampuson nga pagsulong sa Linda Patrol Base sa Barangay Linda, Nabunturan niadtong 2008, sa Napungas Patrol Base sa Asuncion Devao del Norte sa 2010 ug bisan ang pribado nga Earth Savers Security Agency sa Libertad, Butuan City, wa pasayloa ug ilang gisulong niadtong 2012.

Niadtong 2013, si Dagale gilangkob sa pagsakmit sa Compostela Provincial jail Warden ug ang pagpahimutang sa laraw pag-ambush sa mga tropa sa kagamhanan nga gikamatay sa usa ka opisyal sa kasundalohan, kinsa nag-escort sa mga sakop sa Department of Social Welfare and Development (DSWD) sa Kapalong, Davao del Norte niadtong 2014.

Naapil, matud pa usab si Dagale sa pagsulong sa Mining Compound sa Monkayo, Davao de Oro ug Mati Police station niadtong 2014, nga gikamatay sa tulo ka sakop sa army nga miresponde, saysay ni 1Lt Abulencia.

Gilambigit usab si Dagale sa pagsulong sa Lapanday Corporation Plastic Plant sa Buhangin District niadtong Abril 2017 ug sa Lorenzo Farm sa Calinan District, nga ilang gipang dauban.

Didto naangin intawon ang usa ka mamaligyaay ug lab-as nga isda dihang maoy nakaagi sa IED nga gipabuto sa mga komunista nga terorista pagpamatay unta sa mga sakop sa Task Force Davao nga mingresponde sa pag-sulong, segun sa taho.

Lakip usab si Dagale sa pagdaub sa Macondray Plastic Plant sa Panabo City; ang tulo ka pagsamok mingresulta sa binilyon nga pagkasayangs a puhunan ug pagka-undangs a trabaho sa mga sinuholan niini.

Si Dagale, giila nga eksperto sa lansis ug pangilad ug pagpanghaylo sa mga kabatan-onan sa mga pagtulon-an sa mga rebelde ug balikog nga ideyolohiya.

Isip sakop sa Intelligence Unit, iyang trabaho ang mang rekrut sa mga kabatan-onan aron masakop sa Asdang Kultura, nga giila nga usa ka nagpaka-aron ingnon ga grupo sa mga kabatan-onan naa sa teyatro ug pasundayag apan diay gibansay aron maoy tigmonitor ug tigtaho sa deployment ug presensya sa tropa sa kagamhanan.

Ang pagkasikop ni Dagale, nagsumikad sa pagtaho sa mga Bol-anon sa pag-abut sa katingad-an nga dagway sa ilang lugar, segun pa sa taho ni Lt. Abulencia. (rahc/PIA-7/Bohol)

https://pia.gov.ph/news/articles/1053651