Cebuano News: Tulo ka komunidad sa MILF sa Lanao del Norte nakadawat ug ayuda nga bugas

From the Philippine Information Agency (May 27, 2020): Cebuano News: Tulo ka komunidad sa MILF sa Lanao del Norte nakadawat ug ayuda nga bugas (By Zenaida D. Jagudilla)

TANGCAL, Lanao del Norte, May 27 (PIA)—Ang kampo sa Moro Islamic Liberation Front (MILF) nakadawat ug gatosan ka tag-25 kilos nga bugas gikan sa kagamhanang probinsyal.

Ang pagpanghatag sa bugas gipangunahan sa Fourth Mechanized Infantry Battalion ug Fifth Mechanized Infantry Battalion nga pareha anaa ubos sa mando sa Second Mechanized Infantry Brigade.

Ang mga kampo nga nakadawat sa ayuda nga bugas mao ang kampo ni Commissioner Abdullah Macaapar sa Sitio Kura-Kura, Barangay Tamparan sa Munai; 127th Base Command ubos ni Aleem Ansari Murad; ug 125th Base Command nga ubos sa Officer-in -charge Division Commander nga si Samion Pingno sa Tangcal.

Atol sa pagpang apod-apod sa bugas didto sa Tangcal niadtong May 22, nagpadayag si Pingno sa iyang pagdayeg sa gobyerno sa probinsya ug Philippine Army tungod kay gi-apil sila sa pagpanghatag ug hinabang.

Miingon siya nga ang bugas nga ayuda ila pud ipaambit sa uban nga mga sibilyan sa ilang munisipyo.

Sa iyang kabahin, si BGen. Facundo Palafox IV sa 2nd Mechanized Brigade namahayag nga ang ayuda nga bugas gikan kini sa gobernador sa probinsya nga si Imelda Quibranza Dimaporo kaabag ang Go Negosyo.

Iya usab gi-aghat ang komunidad nga magtabang sa pagkigbatok sa coronavirus nga sakit (COVID-19) pinaagi sa pagsunod sa mga insakto’ng giya nga gihatag sa gobyerno.

Matud pa niya nga "mao kini ang panahon nga magtinabangay kay naa kita taliwala sa COVID-19 pandemic nga usa ka kaaway nga dili nato makita.”

Iyang gipasabot ug maayo sa nasangpit nga mga benepisyaryo sa kampo nga “ang pakigkoordinasyon usa ka paagi aron atong mapilde ang mga kaaway nga dili nato makita.” (ZDJ/ PIA-ICIC)

https://pia.gov.ph/news/articles/1043020