IMPASUGONG, Bukidnon -- Gi-abiabi sa 8th Infantry "Dependable" Battalion (8IB), Philippine Army, ang magti-ayon nga NPA sa Bukidnon nga misurender bag-ohay lang.
Si alyas “Alay/Cans/Batcom,” 28 anyos uban sa iyang 26-anyos nga asawa nga si alyas “Peme” desidido nga mi-surender sa 8IB Philippine Army Camp sa lungsod sa Impasugong uban ang iyang 6 ka tuig nga babayeng anak ug 4 ka bulan nga lalaking anak.
Sa usa ka ‘custodial’ nga pag-abiabi, miingon si Alay nga naglihok sila sa kabukiran sa Cabanglasan, ubos sa Section Committe 89 (SECOM89) sa North Central Mindanao Regional Command (NCMRC) isip usa ka ‘combatant’, samtang ang iyang asawa nagsilbi isip ‘medic’ sa ‘Medical Corps’ sa CPP-NPA.
''Gikapoy na mi sa tinago-tago nga panginabuhi ug paglikay-likay sa mga sundalo. Dili na namo ma-agwanta ang kagutom ug katugnaw sa kabukiran uban sa among duha ka gagmay’ng anak. Busa nakahukom mi nga mo-surender. Ug dala namo karon kining mga armas nga maoy gihimong instrumento sa kapintas sa mga NPA. Mao kini ang ilang gigamit sa pagpatay sa mga inosenteng lumad,” matud ni Alay.
Midugang usab pag-istorya si Peme nga apektado sila sa mga panag-away sa mga lider sulod sa organisasyon sa NPA sama sa balik-balik nga panagbingkil, away, ug panagsumpaki sa han-ay sa mga labaw sa grupong CPP-NPA.
Dala sa magtiayon aron i-surender ang upat ka mga pusil—usa ka M16 ug usa ka taas nga magasin—nga adunay mga bala.
Lt. Col. Si Ronald Illana, commanding officer sa 8IB, miingon nga ang magtiayon mga biktima lamang sa pagpanglingla.
''Nasabtan namo nga kining mga tawhana biktima lamang sa kasamok ug bakak nga mga saad sa NPA. Tungod niini, gi-awhag ang atong mga kaigsoonan nga anaa pa sa bukid nga ilang itugyan sa kagamhanan ang ilang pagbag-o ug tan-awon ang mga paningkamot sa gobyerno diha sa pagkab-ot sa kalinaw,” si Illana miingon.
Sa kasamtangan, ang bagong na-‘install’ nga 403rd Brigade Commander nga si Col. Edgardo De Leon, diin maoy co-chair sa “Enhanced Comprehensive Local Integration Program (E-CLIP) nga komitiba, mipasalig nga ang 403Bde makatabang sa mga misurender pinaagi sa pagpa-enrol kanila diha sa 'E-CLIP aron haruhay ug malinawon sila nga magpuyo sa komunidad.
"Alay ug Peme, eksakto ang inyong desisyon. Tungod niini makasiguro mo mga mas maayo ang kaugmaon sa inyong mga anak. Karon nga inyong gisalikway ang kapintas ug midawat kamo sa kalinaw, ang gobyerno motabang kaninyo. Tungod niini, giawhag usab nako ang mga teroristang NPA nga nagplano nga mobalik sa sabakan sa balaod nga dili magpanuko sa pagsurender tungod kay gipasalig nako nga ang 403Bde sa Bukidnon ug Misamis Oriental makatabang kaninyo nga makapahimulos sa E-CLIP sa gobyerno," si De Leon miingon.
Subay niini, si 4th Infantry Division Commander Major General Ronald Villanueva miingon nga ang ubang mga teroristang NPA karon mi-uyon na sa mga panawagan sa gobyerno nga mosurender.
"Nakita nila ang dunot nga sistema sa NPA. Maayo kaayo kay gihunahuna sa magtiayon nga isalikway ang napakyas nga ideolohiya sa NPA. Uban niini nga desisyon, magkahi-usa na unya sila sa ilang mga pamilya ilabi na ang kalipay diha sa kasaulogan sa Pasko,” dugang ingon ni Maj. Gen. Villanueva. (1Lt Lorjohn D. Hernandez, CMO, 8IB, 4ID, PA / PIA Bukidnon)
https://pia.gov.ph/news/articles/1015519
No comments:
Post a Comment
Note: Only a member of this blog may post a comment.