Cebuano News: 403rd Brigade mi-abiabi sa bag-ong commander

From the Philippine Information Agency (Nov 29): Cebuano News: 403rd Brigade mi-abiabi sa bag-ong commander



MALAYBALAY CITY, Bukidnon — Gi-abiabi sa 403rd Infantry “Peacemaker” Brigade (403Bde) sa Philippine Army bag-ohay lang ang ilang bag-ong kumander.

Si Col. Edgardo Y. De Leon milingkod isip brigade kumander, nga maoy mopuli ni Brigadier General Eric C. Vinoya, atol sa seremonya nga gipahigayon sa Brigade Grandstand, Camp Osito Bahian, Malaybalay City.

Sa wala pa ang iyang bag-ong ‘assignment’ sa Bukidnon, si De Leon nagsilbi isip Chief of Staff sa 4th Infantry "Diamond" Division, Philippine Army, Camp Evangelista, Cagayan de Oro City.

Sa iyang pakigpulong, si De Leon nag-awhag sa tanang katawhan sa pagtabang kaniya diha sa pagtukod sa Army nga takus sa pagsalig sa katawhan.

"Uban sa matinabangon nga katawhan, ang inyong Army nagsaad sa usa ka serbisyo nga labaw sa tawag sa katungdanan, usa ka serbisyo nga dunay dedikasyon, pagpaubos ug propesyonalismo," miingon si De Leon.

Sa kasamtangan, si ‘outgoing brigade commander’ Brig. Gen. Eric C. Vinoya, nga mobalhin isip Assistant Division Commander sa 3rd Infantry Division sa isla sa Visayas, mipadayag sa iyang hugot nga pagtuo ug pagsalig sa bag-ong kumander nga makasugakod sa daghang mga hagit nga atubangon niini diha sa iyang mando aron matuman ang mga nagkalainlaing misyon sa Philippine Army.

Gipasalamatan ni Vinoya ang mga sibilyan, mga opisyal sa lokal nga kagamhanan, ang mga sundalo sa 403rd Brigade, ug ang iyang pamilya.

"Ang akong pag-alagad sa 403rd Brigade usa ka dakong dungog ug pribilehiyo sa akong pag serbisyo isip sundalo, busa dili nako kini malimtan sa tibuok kong kinabuhi,” miingon si Vinoya.

Ang 4ID Commander sa Philippine Army nga si Major Gen. Si Ronald C. Villanueva, nga nangulo sa seremonyas, miingon nga ang duha ka mga opisyal naghimo sa sumbanan nga serbisyo ug nagpakita sa ilang pagkamaayo nga lider.

"Usa ka kadungganan ug oportunidad nga ako manamilit sa usa ka talagsaon nga opisyal nga nagserbisyo sobra sa duha ka tuig sulod sa 403Bde alang sa dakong kaayohan. Ingon man usab, kalipay nako nga kita mo-abiabi sa bag-ong kumander nga si Col. De Leon, diin maoy modala sa 403rd Command ug padayon nga manguna sa kritikal nga misyon sa 403Bde alang sa kalinaw sa tibuok nasud," matud ni Villanueva.

Ang 403rd Infantry 'Peacemaker' Brigade anaa ubos sa mando sa 4th Infantry Division sa Army. Usa sa mga responsibilidad niini mao ang pagplano ug pagpatuman sa ‘contingency’ nga suporta alang sa hiniusang operasyon ug maghatag sa ‘contingency support’ sa tibuok nasud. (RLRB/PIA Bukidnon)

https://pia.gov.ph/news/articles/1015517