Cebuano News: Lumad nga gipatay sa NPA nadiskubre sa Surigao Sur

From the Philippine Information Agency (Mar 15): Cebuano News: Lumad nga gipatay sa NPA nadiskubre sa Surigao Sur (Native killed in NPA discovered in Surigao Sur)

CAGWAIT, Surigao del Sur, Marso 15 (PIA)  – Usa napod ka kalabira ang nadiskubre diin gikatahong  gikalot sa mga sibilyan gikan sa gilubngan niini didto sa Sitio Mam-on, Brgy Tubo-tubo sakop sa lungsod sa Cagwait, probinsiya sa Surigao del Sur niadtong Marso 11, 2016.

Matud pa sa usa ka residente sa maong dapit nga ang biktima usa kini ka lumad sa tribung Manobo. Dugang pa niya nga nahitabo ang maong pagpatay niini duha ka tuig na ang milabay ug kini gilubong sa mga rebeldeng NPA human makabsan sa hinulamang kinabuhi.

Sumala pa sa taho, natultulan sa tropa sa 36th Infantry Battalion (36IB) og sa mga kapulisan ang maong gilubngan human kini makadawat og report gikan mga sibilyan diin maoy niasoy sa maong mga panghitabo. Hangtud niining mga taknaa padayun pa ang imbistigasyon sa mga kapulisan sa lungsod sa Cagwait ug ang pag-ila sa maong kalabira.

Kahinumduman, niadtong Oktubre 31, 2015 usa ka lumad sa tribong Manobo usab ang gikatahong gikuha sa mga armadong NPA atubangan sa pamilya niini. Naila ang maong biktima nga si Rexsitoto Garcia, usa ka bantay banwa sa naasoy nga lungsod. Milabay ang upat ka bulan human kini gikuha sa iyang panimalay nakaplagan na lamang ang kalabira niini sa kabukirang bahin human kini gidunggab ug gipusil patay sa mga rebeldeng NPA.

Nasayran sa imbistigasyun nga gipatay sa rebeldeng NPA si Garcia tungod sa hugtanong pagbabag niini sa mga ilegal nga mga pagpamutol sa kahoy nga diin maoy usa sa gisaligan sa mga myembro sa NPA sa ilang mga pagpanulis pinaagi sa pagkolekta ug butaw.

Subay sa taho nga gipagawas sa 36IB, Philippine Army, mukabat sa 428 ka mga lumad ang gikatahong gipangpatay sa mga grupong NPA, wala pa kini maapil ang duha ka mga biktima dinhi sa unang distrito sa Surigao del Sur.

Kabahin sa maong taho, ang batalyon kumander sa 36IB nga si LTC Randolph Rojas mipaabot sa iyahang pagtimbaya sa mga hingtungdan sa duha ka mga biktima. “Akong pakigtimbaya sa mga pamilya sa duha nato ka igsuong mga lumad nga walay kaluoy nga gipatay sa mga NPA,” sulti pa niya.

“Wala maghatag ug respeto ang NPA sa katawhang lumad gani kini gipahimuslan lamang. Unta makamata na ang atong mga kaigsuonang lumad sa kamatuoran nga sila gigamit ug gipahimuslan lamang sa New People’s Army,” Dugang pa ni Lt. Col. Rojas. Sa kasamtangan, padayun ang koordinasyon sa military ngadto sa atong mga kapulisan lakip na usab ngadto sa mga pamilya sa mga biktima  arun mahatagan kini ug dali nga kasulbaran ug hustisya ug mapasaka ang sumbong  batok sa NPA nga maoy nagbuhat sa pagpatay niining duha ka mga lumad.
 http://news.pia.gov.ph/article/view/1741458014423/cebuano-news-lumad-nga-gipatay-sa-npa-nadiskubre-sa-surigao-sur